Март 5-тиң хүнүнде “Ада-чурттуң камгалакчылары” күрүне фондузунуң салбырынга “Туваавтотранс” бүдүрүлге чериниң ажылдакчыларының ээлчеглиг “УАЗ-469” маркалыг автомобилин шериглерже чорудары-биле дамчыткан.
Тываның Автомобиль оруктарының эргелелиниң чер болгаш өнчү-хөреңги хамаарылгаларының килдизиниң даргазы Сергей Пановтуң чугаалап турары-биле алырга, ук албан чери бо акцияда ийи дугаар киржип турар.
“Республиканың орук ажылдакчыларының каттыжыышкынынга ук акцияны тоомча чокка эрттирбейн, киржиринче кыйгырдым. Барыын кожууннардан мурнуу кожууннарга чедир орук ажылдакчылары хөйү-биле ажылдап чоруур. Бо техника чоокта чаа Авдеевкага Тываның тугун көдүрүп турган 55-ки гвардейжи мото-адыгжы (даг) бригаданың дайынчыларынга чедер” – деп, Сергей Панов чугаалаан.
Фронтуже чорудар мурнунда, ук автомобильди ылаңгыя часкы үеде малгашталып турда, тура дүшпес, бүзүрелдиг болзун дээш, бүрүнү-биле хынап, белеткээн.
Бодунуң ээлчээнде Улусчу фронтунуң күүсекчи комитединиң регионалдыг салбырының удуртукчузу Саима Далчин хүлээп алганы автомобильди тускай шериг операциязының девискээринче дугуржулга ёзугаар демир-орук-биле төлевир чокка чедирерин демдеглээн.
“Бистиң шериглеривиске автомобильдер ооң мурнундагызы дег ам-даа хереглеттинип турар. Бистиң партнёрларывыс Россияның демир-орук компаниязының ачызында мурнуку одуругже машиналарны халаска чедирер аргалыг болуп турар бис” – деп, Саима Далчин чугаалаан.
Март 20-ниң хүнүнде машиналардан аңгыда, чылыг идик-хеп, аъш-чем аймаа, Тываның бодунуң бүдүргени тушенкаларны, бензин-биле ажылдаар хирээлерни база өске-даа техниктиг херекселдерни 2 неделя болгаш чорударын ол демдеглээн.
Чыжыргана СААЯ.
Буян Ооржактың тырттырган чуруктары.
«Шын» №17 2024 чылдың март 6
