Сибирь федералдыг округтуӊ бирги чери дээш шыдыраа маргылдаазы элээди оолдар, уруглар аразынга болуп эрткен. Ол Кемерово хоорайга октябрь 29-тан тура ноябрь 9-ка чедир болган.
Кызыл хоорайның немелде өөредилге төвүнүң чалыы шыдыраачылары тренер башкы Сергей Түлүштүң удуртулгазы-биле чедиишкинниг киришкеш, чанып келгеннер.
Дүрген ойнаарынга (блиц) 17 харлыг уруглар, оолдар аразынга тус-тузунда бирги черни Арина Иргит биле Давид Сенди алган.
Композицияга 13 харлыг оолдар аразынга бирги черге Дүгер Допай төлептиг болган. Дүрген оюнга (блиц) Шуру Ондар (19 хар) 2-ги черни, Дүгер Допай (13 хар) 3-кү черни алган.
Классиктиг шыдыраа оюнунга Чамзы Начын (13 хар) үшкү черни, Арина Иргит 2-ги черни (17 хар), Давид Сенди (15 хар) 2-ги черни алган.
Бо шыдыраа маргылдаазынга 1–4 дугаар черлерни алган чалыы спортчулар Россияның 1-ги чери дээш маргылдаага киржир эргени чаалап алганнар. Ол Екатеринбург хоорайга 2024 чылдың апрель 1–16 хүннеринде болур.
Чалыы шыдыраачы Арина Иргиттиӊ Россияның уруглар Кубогунуң финалынга киржир эргени алганы улуг чедиишкин болур. Бо маргылдаа удавас декабрь 5–13 хүннеринде Ярославль обласка болур.
Алексей ЧАМБАЛ-ООЛ.
Чуруктарны авторнуң архивинден алган.
«Шын» №89 2023 чылдың ноябрь 22
