Чөөн чүктүӊ экономиктиг шуулганы бо хүннерде Владисвосток хоорайда болуп турар. Тываныӊ Баштыӊы Владислав Ховалыг Сибирь регионнарыныӊ губернаторлары-биле кады ук шуулганда киржип турар.
«Сибирь федералдыг округтуӊ шупту регионнарын «Улуг Сибирь» деп экспозицияда таныштырып көргүскен. Ону «Сибирьниӊ дугуржулгалары» регионнар аразында ассоциацияныӊ чөвүлели белеткээн. Соӊгукчуларныӊ бүзүрелин чаалап алган коллегаларымга чүнү-даа мурнай байырым чедирдим. Сайгарып чугаалашкан кол темавыс – Сибирьниӊ социал-экономиктиг хөгжүлдезиниӊ эчис сорулгаларын херек кырында канчаар боттандырары. Ук документини амыдыралга боттандыргаш, Сибирь федералдыг округту 2035 чылга чедир шалыпкын хөгжүлделиг экономиктиг төп кылыр деп турар. Ону кылырда, регион бүрүзүнүӊ күштүг талазын ажыглаар деп санап турар.
Ыраккы Чөөн чүк ол талазы-биле улуг арга-дуржулгалыг. Бистерге, Сибирь регионнарыныӊ губернаторларынга, ону өөренип көрүп алыры чугула. Чөвүлелдиӊ организастыг айтырыгларын база шиитпирледивис. Сибирь регионнарыныӊ аразында ассоциацияныӊ транспорт талазы-биле координация чөвүлелин баштаар кылдыр мени деткээн.
Чөөн чүктүӊ экономиктиг шуулганынга кызыгаар таварыштыр кады ажылдажылга дугайында чугаалаштывыс. Федералдыг каайлы албаныныӊ удуртукчузунуӊ ажыл-хүлээлгезин түр үеде күүседип турар Руслан Валентинович Давыдов-биле ужуражып чугаалаштым.
Хандагайты – Боршоо эрттирилге пунктузунуӊ чаартылгазын сайгарып көрдүвүс. Ол пункт дыштаныр хүн чокка, хондур ажылдаар. Ынчангаш аӊаа немей кадрлар курлавыры херек болгай. Бо айтырыг шиитпирлеттине бээр дээрзин Руслан Валентинович бүзүредип чугаалады. Эрттирилге пунктузун чаартып кылган соонда, аӊаа ажылдаар улустуӊ чурттаар оран-савазын база сайгарып чугаалаштывыс» -деп, Владислав Ховалыг социал четкиде блогунга бижээн.
Тываныӊ Баштыӊы Владислав Ховалыг «Россияныӊ Кызыгаар тудуглары» федералдыг албан чериниӊ 156 чыл оюн таварыштыр байыр чедирген.
«Силерниӊ кылып турар ажылыӊар улуг чуртувуска болгаш кызыгаар чоогунда бистиӊ республикавыска дыка улуг ужур-дузалыг. Эрттирилге пунктуларын тудуп, оларны чаартып кылып, үзүк-соксаал чок ажылдаар кылдыр хандырып тургаш, даштыкы садыг-саарылгага, хамаатыларныӊ кызыгаар таварыштыр хостуг аргыжарынга таарымчалыг байдалды тургузуп турар болгай силер.
Хандагайты – Боршоо эрттирилге пунктузун чаартып кылыры Тываныӊ сайзыралынга улуг ужур-дузалыг болур. Россиядан тура Моол, Кыдатче чоруур автомобиль оруунуӊ коридорун тургузарынга кол черни ээлеп турар. Бистиӊ республикавыстан аӊгыда, Россияныӊ өске-даа регионнары, Азия чурттарында партнерлары база ону сонуургап турар. Силерниӊ командаӊарга профессионал чедиишкиннерни, кадыкшылды болгаш чаагай чолду күзедим!» деп республиканыӊ удуртукчузу демдеглээн.
Р. ДЕМЧИК белеткээн.
Чуруктарны интернеттен алган.