Бо эпидемиологтуг сезон бүдүүзүнде, гриппке удур тарылга кылыр 71800 кезек эм эрткен неделяда республикада келген. Росхереглелхайгааралдың ТР-де эргелелиниң удуртукчузу Людмила Салчак девискээр болгаш участок соңгулда комиссияларының киржикчилери дээш, чурттакчы чоннуң чамдык бөлүүн дарый тарып эгелээрин регионнуң Кадык камгалал яамызынга сүмелээн.
Республиканың чурттакчы чонунуң 60 хире хуузун, азы 200 муң хире кижини грипп эпидемиязының мурнуу чарыында тарыыры планнаттынганын сагындыраал. 106 928 улуг кижилер база 92 643 бичии уруглар тарыышкынны алыр.
Кадык камгалал, өөредилге адырының ажылдакчыларынга, социал ажылдакчыларга, студентилерге, шеригже кыйгыртканнарга, хоочураан аарыглыг кижилерге, иштиг херээженнерге, 60 хар ашкан назылаан кижилерге бюджет акша-хөреңгизи-биле саткан вакциналарны салыр.
Соңгулда комиссияларының кежигүннери хөй кижилер-биле аралажып чугаалажыр болганда, оларны бир дугаарында тарыырын Людмила Салчак сүмелээн. Чүгле соңгулда комиссияларының кежигүннери эвес, а бадылаашкынга келген кижилерни камгалаарын демдеглээн.
6 айдан өрү назылыг уруглар тарыыр «Ультрикс Квадри», 60 харлыг өрү назылыг кырганнар, иштиг херээженнер база айыылдыг бөлүкке хамааржыр кижилер тарыыр «Ультрикс Квадри», улуг кижилер тарыыр «Совигрипп» вакциналар август 25-те республикада келген.
Бо күзүн сovid-19-ка удур тарыышкынны чылда чаңгыс катап кылырын РФ-тиң Кадык камгалал яамызы дыңнаткан.
60 хардан өрү назылыг кижилерге, өкпе-хөрээ хоочу аарыг, туберкулезтуг, хан-дамыр аарыглыг, чигир база семириир аарыгларлыг, ВИЧ-инфекциялыг, аутоиммуннуг, ыжык аарыгларлыг, ооң мурнунда тарытпаан база коронавируставаан 18 хардан өрү назылыг улуска сovid-19-тан тарылганы бир дугаарында салыр.
ТР-ниң Чазааның парлалга албаны.