Сентябрь 10-да чаңгыс аай бадылаашкын хүнүнде Тыва Республиканың девискээринге 59 муниципалдыг деңнелге (Ак-Довурак хоорай округунуң база 7 кожууннар: Чөөн-Хемчик, Бии-Хем, Сүт-Хөл, Таңды, Улуг-Хем, Чеди-Хөл, Эрзин кожууннарның, Чадаана хоорайның болгаш 50 көдээ суурларның) 621 депутаттың мандадын солуур соңгулдалар болуп эртер.
Бо соңгулдаларда 14 девискээрниң, 95 соңгулда участоктары ажылдаар.
Улуг-Хем кожууннуң чедиги чыыжының депутаттарының соңгулдазынга кожуунда соңгулда участоктары 100 хуу белен.
Чижээ, Арыг-Үзүүнүң 171 дугаар соңгулда участогунуң даргазы Тамара Тюлюштуң чугаалап турары-биле, бүгү белеткел ажылдары доозулган. Соңгулда участогунда соңгукчуларның бадылаан бюллетеньнерин ол-ла дораан электроннуг хевирге санап үндүрүп келир электроннуг урналарны салган:
- Бистиң суурда соңгулда участогун Культура бажыңында чаңчыл ёзугаар тургускан. Сентябрь 10-да соңгулдада хамааты хүлээлгезин идепкейлиг күүседип кээр болза, 837 соңгукчу бар. Сентябрьның 8-ке чедир баш бурунгаар соңгаан улус чок. Бистиң суурувусту ийи округта үскен – Иштии-Хемниң 17 дугаар округу, Арыг-Үзүүнүң 19 дугаар округу. Бүрүткеткен чаңгыс кандидадывыс бар. Соңгулда хүнүнде соңгукчулар идепкейлиг келир дээрзинге бүзүреп турар бис. Соңгукчуларның бадылаан бюллетеньнерин ол-ла дораан электроннуг урналар санап үндүрүптери эптиг – деп, Тамара Михайловна чугаалады.
Ук соңгулда участогунда соңгукчуга эптиг болзун дээш чогуур байдалдарны таарыштыр тургускан, арыг-силиг. Ында ажылдап эгелээн харыысалгалыг комиссия кежигүннери: “Бо электроннуг урналарның эптиг чүвези – таңма чок, меге бюллетень эрттирбес, дораан үндүр октаптар. Ынчангаш соңгулдаларның, шынап-ла, шынныг эрттериниң магадылалы ында” – деп немедилер.
К. Монгуш
