Шампан ижер бокал кайыын тывылганыл?
Шампан ижер бокал француз кадын, Людовик хаанның кадайы Мария Антуанеттаның эмиглериниң хевири болгаш хемчээли-биле дең.
Француз хаан Людовик XIV кадайынга дыка ынак, ону магадаар болгаш, ооң эмииниң хевири-биле хрусталь аякты дүрзүлеп кылыр дужаалды берген.
Ынчалдыр шампан ижер дыка ханы эвес, ишкир бокал тывылган.
Бикинини кым чогааткан деп?
Бикини — ийи эдилелден тургустунган кыс улустуң эштирде кедер ажык кос-тюму. Бир дугаар ону 1946 чылдың июль 5-те Парижке мода делгелгезиниң үезинде хөй чон мурнунга көргүскен. Ону модельер Луи Риар чогааткан деп санап турар.
Эгезинде Риар Парижтиң бир каас-шиник бассейнинге бикининиң баштайгы делгелгезин кылыр деп турда, чанагаш мага-бодун чон мурнунга көргүзүптер чараш модель кыстар тывылбаан. Чүгле Парижтиң бир клувунуң самчызы кыс Мишлин Бернардини чаа чүүлдү көргүзеринге чөпшээрешкен.
Бикини 50 чылдарның ортан үезинде модаже кирген. 1950 чылдарда бикинини нептередиринге Бриджит Бардо база Мэрилин Монро улуг үлүг-хуузун киирген.
Эштирде кедер хептиң чаа хевирин мурнунда АКШ-ка ядерлиг шенелделер чорудуп турган Атолл Бикиниге (Оожум океанда ортулук) тураскаадып адаан. Ол чараш сөске Риар дыка таарзынган, сактып алыры база белен болган.
Телер чүге чалым хаядан аңдарылбазыл?
Кончуг кадыр чалым хаядан телер аңдарылбас. Олар хаяның бичии-ле кертилек черинге туруп, харын-даа маңнап шыдаптар. Телерниң дуюглары чиңге, кадыг боорда, калбартыр херли бээр. Тептинген дажындан тайбас чымчак, чыпшыныычал сыртыкчыгаштар дуюгларында бар.
Ол ышкаш те чалымның хензиг тиглерин безин көрүптер чидиг карактыг. Тениң базыпкан дажы хөлүн эрттир боъш болза, ол дораан иттингеш, улаштыр шурап чоруп каар.
Мароконуң мурнуу-чөөн чүгүнде азырал өшкүлер аргания деп ыяштың чимизин чиир дээш кырлап, харын-даа шыпшык бажынче безин үне бээрлер.