Даштын сооктар күштелип, агаарның температуразы -40-ден -43 чедир дыңзып эгелээнин барымдаалап, бот-боттарывысты карактажып, камгалап, ылаңгыя уруг-дарыгче кичээнгейни күштелдирип, автобус доктаар черде үр турар ажы-төлдү орук аайы-биле машинаңарга олуртуп алгаш, чедер черинге чедирип каарындан ойталавайн көрээлиңер.
Ол ышкаш, чаныңарда кожа чурттап турар кожаларыңарның хөмүрү, одаар ыяжы бар-чогун айтыржыры база артык эвес. Дүне-хүндүс дивейн, узун орук кыдыында үрели берген турар машиналар чанындан тоомча чок эртпейн, кандыг дуза херегин айтырып, болдунар шаа-биле дузалажып, энерел сеткилдиг болуру чугула.
❆ Соок агаардан болганчок кулактар, думчук база чылыглаттынып камгалаттынмаан хол-буттуң салаалары үжүп болур. Кеткен идииниң оъду чок, кезээде деридип чоруур буттуг улус буттарын чылыглаар болза эки.
❆ Мага-ботту үжүп-доңарындан камгалаар дизе, чогуур кылдыр кеттинип алыр. Шык эрттирбес болгаш чылыг салбас бедик технология- лар-биле кылган материалдардан даараан хеп кеткени дээре.
❆ Баш болгаш моюнну чылыглаары чугула, чүге дизе ында башче хан дамчып турар дамырлар бар.
❆ Соок үеде даштыгаар үнер мурнунда, тоттур чемненип алыры чугула. Чедир чемненмээнинден болгаш могап-шылаанындан организм удурланып, камгаланыр арга-шинээ кудулап, үжүп-доңарының чылдагааны оон эгелээр.
❆ Херээжен улус шык косметика ажыглаарындан ойталаары база чугула. Шыгыдып чымчадыр кремнер база ажыглавас болза эки, а хоолулуг кремни даштыгаар үнеринге чедир бир шак бурунгаар чаап ап болур. Бо таварылгада бажыңга хаван чаа турар болза эки. Ону буска эзилдиргеш, соодукчуга шыгжаар. Соокта ол улуг-даа кижиниң, ылаңгыя бичии уругларның кежин дыка эки камгалаар. Арынны сооктан кас үзү база эки камгалаар азы ону солаан тускай косметиктиг херекселдер.
❆ Кандыг-бир чорук кылып чорааш, холдарыңар азы буттарыңар, а ол ышкаш мага-боттуң өске кезектери доңуп эгелезе, дарый чоокку садыгже кирип, чыннып алыңар.
❆ Аргажок доңупкан болзуңарза, изиг шайдан (малина азы лимон холаан) аартаар.
Аргалыг болза, дыңзыг сооктар үезинде бажыңдан үнмезин кызыдыңар! Кадык болуңар!
Медээни болгаш чурукту интернеттен алган.
“Шын” №95 2023 чылдың декабрь 13
