Республикада спортче хаара туттунган кижилерниң саны доктаамал өзүлдеде. «Демография» национал төлевилелдиң «Спорт – амыдыралдың нормазы» регионалдыг төлевилел чорудуу-биле спортчу объектилер септелгези болгаш тудуу калбарган. Россияның Президентизи Владимир Путинниң инициативазы-биле боттандырып турар национал төлевилелдер – чурттуң хөгжүлдезиниң мурнады боттандырар угланыышкыннары болуп турарын сагындыраал.
Тываның спортчулары болгаш тренерлери 2023 чылда тергиин чедиишкиннерлиг болган. Регионалдыг Спорт яамызы амыдыралдың кадык овур-хевирин суртаалдаарын калбартып, аңгы-аңгы деңнелдиң спортчу хемчеглерин көвүдеткен.
2024 чылда регионнар аразынга бүгү-российжи база делегей чергелиг үш чүс хире болгаш республика чергелиг база ол хире маргылдаалар эртер.
Республикага июньда «Интеллектуалы Сибири» Бүгү-российжи шыдыраа фестивалы, июльда – эр болгаш херээжен спортчулар аразынга ча адарынга Россия чемпионады, августа – «Азия төвүнүң Кубогу» делегей турнири дээш өске-даа улуг хемчээлдиг маргылдаалар планнаттынган.
«Забег РФ», «Оранжевый мяч», «Кросс Нации – 2024» Бүгү-российжи акциялар, школачылар болгаш студентилер, хоочуннар, кадыкшылы кызыгаарлыг кижилер аразынга республика спартакиадалары уламчылаар. Өг-бүле чылынга тураскааткан өг-бүле командаларының аразынга «Тыва Республиканың эң спортчу өг-бүлези» маргылдаалар, спорттуң национал хевирлеринге чемпионаттар чонну хаара тудар.
Красноярскстаттың сан-чурагайы-биле алырга, Тывада эр болгаш херээжен чоннуң 36 хуузу боттары спорт-биле белеткенип турар. Республиканың чеди чурттакчызының бирээзи-ле спортчу организацияже барып турар.
ТР-ниң Чазааның парлалга албаны.
“Шын” №3 2024 чылдың январь 17
