«Статистика диктантызын» күзелдиг кижи бүрүзү бижип болур. Бо хемчегни Күрүне статистиказыныӊ федералдыг албаны организастаан.
2019 чылда 1-ги статистика диктантызынга 2 региондан чүгле 500 кижи киришкен. 2022 чылда Россияныӊ 80 регионундан 5 муӊ хире кижи диктант бижээн.
Ниитизи-биле дөрт чыл дургузунда 10 муӊ кижи статистика талазы-биле билиглерин немеп, чаа чүүл билип алырынга чүткүлдүүн бадыткаан.
«Медээлер-биле ажылдап билири XXI -ги чүс чылдыӊ кол негелделериниӊ бирээзи-дир. Статистиктиг диктант бижээш, кижи бодунуӊ билиин шенеп хынап көөр, оон аӊгыда, чаа-чаа билиглер-биле чепсегленир. Эртем-билигже чүткүлдүг кижилерни бо хемчег каттыштырып турар» - деп, Росстаттыӊ даргазыныӊ оралакчызы Сергей Егоренко тайылбырлаан.
2023 чылдыӊ 5-ки статистика диктантызын бо неделяда бижип болур. Онлайн-акцияга киржирде, дараазында сайтыга бүрүткедир: https://sd.rosstat.gov.ru
Диктантыныӊ айтырыгларын бүгү чурттуӊ статистика албаныныӊ специалистери тургускан. Киржикчилер 60 минута иштинде 30 айтырыгга харыылаар. Статистиканыӊ төөгүзү, медээ чыырыныӊ аргалары, амгы үеде статистиктиг санаашкын үндүрер аргалар, бодалгалар дээш солун айтырыгларга харыылаар.
Диктант бижээн кижи бүрүзү сертификат алыр, тергиин эки бижээн улуска Росстаттыӊ тураскаалдыг шаӊналдарын тыпсыр.
Красноярскыныӊ статистика албаныныӊ медээзи-биле Р. Демчик белеткээн.