“Кызылда солагай талакы эриктиң дача ниитилелдериниң Цветочная деп кудумчузунда 2 – 3 чыл чурттап турар мен. Бажың бүрүзү черже киир казып каан кудуктарлыг болгай. Суглуг хумуңнар ишти агарып каар, электрилиг хөнекке суг хайындыргаш, ак чүүлдерниң хөнек дүвүнге турнугарын манап алгаш, өске саваже кудуп алгаш, шай ижер-дир бис. А хөнек дүвүнге арткан суг хоюг ак апаар. Өске чемнерге ак чүүл ылгаттынмас. Сугдан кээп турар ак чүүлдерниң кадыкшылга хора бар-чогун хынап болур бе?”
Тамара Шинчик.
“Гигиена болгаш эпидемиология төвү” Федералдыг күрүне албан чериниң чагыкчылар-биле ажылдаар килдизиниң эргелекчизи Салбакай ОЮН:
– Суг агарып турар болза, ооң санитарлыг болгаш химиктиг көргүзүүн хынап болур. Сугну хынадырда, бистиң килдиске келгеш, билдириишкин киирип, керээ чарып алыр. Сугнуң хоралыг азы хора чогун хынадырда, ону кудуктан 10 хире минута чедир аксыпкаш, бир литр пластик арыг савага узуп эккээрин сүмелээр-дир бис. Бир эвес кудукту ханы эвес казып каан болза, чер адааның 1-ги каъдындан кээп турар болур. Чамдык бажыңнарның иштики туалединиң артынчылары, ваннага чунган суунуң хири черниң 1-ги каъдынга кээр болур. Ынчангаш кудукту 20 м чедир киир кастырар болза эки. Ынчан суг арыг болур.
Сугнуң санитарлыг болгаш химиктиг көргүзүүн хынадырда, дараазында адреске чагыг киирип болур: Кызыл хоорай, Росхереглелхайгааралдың бир дугаар каъдында “Гигиена болгаш эпидемиология төвүнүң” 127 дугаар өрээли, тел.: 5-43-79 (немелде 1-ни базар).
/ Алиса ДОНГАК белеткээн.