Март 24-те Орел хоорайга сумога Россияның чемпионадынга 20 региондан 150 эр, 102 херээжен спортчулар киришкеннер. Маргылдаа үезинде Россияның сумо федерациязының отчет-соңгулдалыг конференциязы болган. Аңаа Субудай Монгушту Россияның сумо федерациязының оралакчы президентизи база совет кежигүнү кылдыр соңгаан.
Ол маргылдаага тыва мөгелер кайгамчыктыг хүрешкеннер – 6 алдын медаль алган. Бистиң мөгелеривис 3 чыл улаштыр команда талазы-биле тиилеп, төрээн республиказын алдаржыдып турар. Бо чедиишкиннерни Тываның сумо федерациязының, тренерлериниң, судьяларының эки ажылының түңнели деп демдеглээр апаар.
Килдер аайы-биле шаңналдарже киргеннер: 70 килге 2-ги черни – Сайын-Белек Дувендей, 3-кү черни – Ай-Хаан Монгуш; 77 килге 1-ги черни – Тумен Куулар, 3-кү черни – Гендун Монгуш; 85 килге 1-ги черни – Айдың Даржаа, 2-ги черни – Хүлер Даржаа; 92 килге 1-ги черни – Субудай Шойдун, 3-кү черни – Александр Доржу; 100 килге 1-ги черни – Артыш Ооржак, 2-ги черни – Туметей Ширижик, 3-кү черни Сулде Донгак биле Кайгал-оол Ондар үлешкеннер (шупту тыва); 115 килге 1-ги черни – Айдың Монгуш, 3 дугаар черни Сайын-Белек Тюлюш биле Мерген Монгуш үлешкеннер.
Тулган тиилекчи дээш хүрешке Мерген Монгуш чемпион болган, 3-кү черни Айдың Монгуш биле Кайгал-оол Ондар алганнар.
Чемпионаттың эрттирикчилери чаңгыс команда кажан-даа ынча хөй алдын медальдар албаан деп демдеглээн.
/ Алексей ЧАМБАЛ-ООЛ.
"Шын" 2023 чылдың апрель 1 №23
#Шын #Тыва #Спорт #Сумо #Орел
