Бии-Хем кожууннуң Суш сумузунда чаа уруглар садының оран-савазы байырлыг байдалга ажыттынган. Уруглар садынче 2-ден 7 хар чедир 30 ажыг чаштар хаара туттунар.
Шак бо уруглар садының тудуу 90 чылдардан тура узамдыккан. ынчан 400 дөрбелчин метр хемчээлдиг 2 каът оран-саваны тудуп каан турган. Уруглар сады ажылдап турган, ынчалза-даа суурнуң чурттакчы чонунуң амыдыраар арга дилеп, өскээр көжүп чоруп эгелээни-биле холбаштыр, уруглар сады баар чаштарның саны оранчок эвээжей берген турган - 2 каът уруглар садынга 10 шаа чаштар барып турган. Мындыг байдалга улуг оран-саваны ажаап-хайгаарап, хандырары берге апарганы билдингир. Ынчангаш оран-саваны көдээ культура бажыңы кылдыр ажыглаары-биле дамчыдып берген, а уруглар сады 1948 чылда туттунган чуртталга бажыңынче көже берген.
Бо хүннерде байдал сыр өскерилген, кожуунда-даа, суурларда-даа ажы-төл саны көвүдеп эгелээн. Суш суурда 10 чашка таарыштырган турган уруглар садының бажыңы чедишпес апарган. Ооң-биле кады, Росхереглелхайгааралдың негелделеринге дүүшпес болуп турары тодаргай.
Амгы чаа, чараш, улуг, делгем, чаагайжыттынган уруглар сады ада-иелерниң, чаштарның, ажылдаар коллективтиң сагыш сеткилинге онза таарышкан.
Бии-Хем кожуун чагыргазының медээлери-биле.
