Бо неделяда Тывага сарыг шажынчыларга төөгүлүг болуушкун болган. Ол дээрге регионнуң Баштыңының шиитпири-биле Камбы-лама эргелелиниң өнчү-хөреңгизинче элээн каш сарыг шажынчы объектилерни дамчыдып берген. Аңаа Кызыл хоорайда “Цеченлинг” хүрээзи болгаш ооң девискээри, чанында турар оран-савалар, "Туптен Чойхорлинг" хүрээзи, Чөөн-Хемчик кожуунда “Үстүү-Хүрээ” турар девискээри болгаш чанында турар оран-савалары-биле кады хамааржыр. Ол бүгү ооң мурнунда республиканың өнчү-хөреңгизи кылдыр санаттынып турган.
Ук оран-саваларны дамчыткан дугайында документилерни эргелелдиң кежигүннери-биле ужуражылга үезинде тыпсып тура, Россия шажындан аңгы турар күрүне дээрзин Тываның Баштыңы Владислав Ховалыг демдеглээн. Бистиң чуртувус хөй нациялыг, хөй шажынныг дээрзин чоокта чаа православ чоннуң Пасханы, ооң мурнунда Навруз байырлалын демдеглеп турганы бадыткап турар. Ук объектилерни Камбы-лама эргелелинге дамчыдып бергени сарыг шажынчы философия төптериниң чүдүкчүлеринге кончуг чугула болур болгаш чоннуң чырыдыышкын талазы-биле хөгжүлдезинге ажык-дузалыг болур дээрзинге Тываның Баштыңы идегеп турарын илереткеш, чоннуң чаагай чоруу дээш улаштыр эки ажылдаарын күзээн.
Тываның Камбы-ламазы Гелек Нацык-Доржу бо төөгүлүг болуушкун республиканың сарыг шажынчыларынга кончуг улуг ужур-дузалыг болуп турарын демдеглевишаан, өөрүшкүзүн илереткен: “Республикага сарыг шажынны сайзырадырының паспорту деп адап болур документилерни Тываның Баштыңы Владислав Ховалыгның тыпсып турарынга сеткилимден өөрүп тур мен. Владислав Товарищтайовичиге бо эгелекчи саналы дээш база ол ышкаш бистиң республикавыска сарыг шажынның хөгжүлдезинче улуг үлүг-хуузун киирген бистиң маадырывыс Сергей Шойгуга база улуу-биле өөрүп четтиргенивисти илередип тур бис”.
Тываның Камбы-лама эргелели документилерни холга алган дораан келир үеде регионга буддизмни сайзырадырының планын сайгарып чугаалажып эгелей берген. Камбы-ламаның чугаалап турары-биле алырга, оларның мурнунда салып турар сорулгалары аажок хөй.
“Бо алган документилеривис бистиң мурнувуста дыка хөй аргаларны ажыдып турар. Чижээ, Тибет медицина төвүн ажыдары, чаа хүрээлерни ажыдары дээш оон-даа өске. Республиканың Камбы-лама эргелелинде шупту хүрээлерни чогуур байдалга эдилээр бис” – деп, Гелек Нацык-Доржу демдеглээн.
Ол ышкаш “Цеченлинг” хүрээзиниң бүгү-ле эргежок чугула коммуналдыг төлевирлери ооң мурнунда чоннуң өргүл-сөңү-биле төлеттинип турганын Камбы-лама демдеглээн. Өске хүрээлер чүгле чырык дээш төлеп турган.
Төнчүзүнде, ол Тываның кожууннарында чурттакчы чонну боттарының девискээрлеринде ээн турар сарыг шажынчы хүрээлерни база республиканың Камбы-лама эргелелинче дамчыдып бээринче кыйгырган.
“Тываның чамдык кожууннарында хөй чылдар дургузунда ээн турар сарыг шажынчы хүрээлер барын билир мен. Ынчангаш ол хүрээлерни овур-хевир киирип алгаш, аңаа сарыг шажынны сайзырадыры-биле, республиканың Камбы-лама эргелелинге хүлээдип бээриңерни оларның ээлеринден диледим” – деп, Гелек Нацык-Доржу чугаалаан.
/ Чыжыргана СААЯ.
Буян ООРЖАКТЫҢ тырттырган чуруу.
"Шын" №29 2023 чылдың апрель 22
Төөгүлүг болуушкун
22 апреля 2023
32