ТР-ниң Культура яамызының “ Культурлуг десант” деп профессионал культураны чон аразынга нептередир сорулгалыг төлевилели эгелей берген.
Январь 25-те Кызыл кожууннуң Ээрбек суурунга ТР-ниң Культура яамызының бо чылын боттандырып эгелээн чаа төлевилели ёзугаар Тыва үндезин культура төвүнүң специалистери тыва чоннуң үндезин культуразынга тураскааткан программазы-биле аалдап четкен.
Эгезинде кожууннуң чагыргазы болгаш культура албан черлериниң удуртукчулары, ажылдакчылары болгаш башкыларынга методиктиг семинарны эрттирген. Аңаа Коңгар-оол Ондар аттыг Тыва үндезин культура төвүнүң директору Игорь Көшкендей, оралакчызы Меңги Ондар төптүң кылып чорудуп турар солун төлевилелдериниң болгаш кылып чорудуп турар ажылының кол угланыышкыннарының дугайында таныштырган. Төптүң өөредилге-методиктиг килдизиниң начальниги А.В. Хорбаа Шагаа дугайында болгаш өске-даа тыва чоннуң ёзу-чаңчылдарының дугайында тайылбырны кылган. Тыва улустуң аас чогаалының жанрларының дугайында тодаргай тайылбырны Ш.В. Чолдак-оол кылган.
Ужуражылганың ийиги кезээнде Тыва үндезин культура төвүнүң специалистери Ш.А. Ондар биле Э.В. Дамдын тыва чоннуң национал оюннары кажык, буга-шыдыраа, тыва ча адарынга маргылдаа эрттирген.
Оон аңгыда, чонар-даш чонарынга көргүзүг кичээлдерге мастер О.В. Сат чонар-даштан үнүп келген чылдың сүлдези – улуну канчаар чонарын эгезинден төнчүзүнге чедир кылып көргүскен.
“Культурлуг десант” төлевилел ёзугаар бир дугаар үнүүшкүнүн Тыва үндезин культура төвүнүң специалистери байырлыг концерт-биле дооскан. Аңаа хөйге билдингир “Тыва” ансамбли чыылганнарга аян туткан. Көрүкчүлер-даа, артистер-даа омак-хөглүг тарап чанган.
Бистиң корр.
Медээни болгаш чуруктарны ТР-ниң Культура яамызының сайтызындан алган.
“Шын” № 7 2024 чылдың январь 31
