Тываның Баштыңы Владислав Ховалыг Тыва Республиканың Дээди Хуралынга (парламентизинге) Айыткалында тускай шериг операциязының хоочуннары болгаш киржикчилери амгы үениң медицина-курорт негелделеринге дүүштүр катап тудуп тургускан “Чедер” курортка чиигелделиг путёвкалар-биле дыштанып болур дугайында чарлаан.
ТШО-нуң киржикчилери “Чедер” курортка чиигелделиг путёвкалар-биле дыштанып, кадыын быжыглап алырының хемчеглерин ажылдап кылыр даалганы “Ада-чурт камгалакчылары” күрүне фондузунуң Тывада салбырының болгаш республиканың Кадык камгалал яамызының удуртулгазынга Владислав Ховалыг берген.
“Чедер” курортка ТШО-нуң киржикчилериниң баштайгы ийи бөлүү июнь, июль айларда дыштанып, кадыының байдалын улам быжыглаан дугайында “Ада-чурт камгалакчылары” күрүне фондузунуң Тывада салбырының ажылдакчылары дыңнаткан. Бөлүк бүрүзү 7 хонук дыштанып, Чедер хөлден алган эм-дом шынарлыг малгаш болгаш суг ванналарынга кирип, аржаанны ижип, массаж дээш кадыкшылга эмнелгезиниң янзы-бүрү хевирлериниң ачы-дузазын алганнар. Чедер хөлдүң малгажы болгаш суу эът-кеш, нерв, чүстер, хол-бут аарыгларын болгаш сөөк кемдээшкиннерин эмнээринге дузалыг, ынчангаш ТШО-нуң киржикчилериниң кадыының байдалын экижидеринге дыка таарымчалыг.
“Амгы үениң негелделеринге дүүштүр туттунган болгаш дериттинген “Чедер” курортка дыштаныры биске дыка таарымчалыг, кадыывыс экижидеринге эки салдарлыг болду. Кызылдан ырак эвесте, чедер орук-чирии дески курортка кадыын экижидип алырын дайынчы эштеримге сүмелеп тур мен” — деп, ТШО-нуң киржикчизи Иван Моңгуш чугаалаан.
ТШО-нуң киржикчилериниң “Чедер” курортка дыштаныр дараазында бөлүктерин чыып белеткеп турарын “Ада-чурт камгалакчылары” күрүне фондузунуң Тывада салбырының ажылдакчылары дыңнаткан.
Кадыкшылды экижидеринге “Чедер” курортта бүгү таарымчалыг байдал барын аңаа дыштанган кижилер демдеглеп турарлар. Чаңгыс болгаш ийи кижи чурттаар өрээлдер бүрүзү арыгланыр черлерлиг, душтарлыг, телевизорларлыг, кондиционерлерлиг. Дыштанып келгеннерни курорттуң столоваязында амданныг аъш-чем-биле хүнде үш катап чемгерип турар.
Курорттуң кадыкшыдылга бажыңының адаккы каъдында Чедер хөлден алган малгаштың болгаш сугнуң чылыг ванналарынга кирип, кадыын быжыглаа- ры – курортка келгеннерниң кол сорулгазы. Малгаш биле суг ванналарындан аңгыда, суг-биле кадыкшыл экижидериниң янзы-бүрү аргаларын, массаж ачы-дузазын улуг эвес өртек-биле немей ап болур.
Дыштанып келгеннерниң аразында малчыннар, башкылар, пенсионерлер дээш кандыг-даа хар-назылыг, эртем-мергежилдиг кижилер бар.
Чедер хөлдүң малгажының болгаш суунуң эм-дом шынарын эки билир кижилер Хакасия, Красноярск край, Кемерово область дээш Тыва-биле кожа-хелбээ өске-даа регионнардан кээп турар.
Ш. МОҢГУШ белеткээн.
ТМГ-ниң чуруктары.
“Шын” №27 2025 чылдың июль 17