ТР-ниң Баштыңы Владислав Ховалыгның даалгазы-биле чаа үнген чылдың баштайгы хүннеринде кожууннарның чагырга черлериниң ажылдакчылары, мал эмчилери болгаш ниити аарыглар эмчилеринден тургустунган бөлүктер малчыннарже үнүүшкүннерни кылган.
Таңды кожууннуң көдээ ажыл-агый эргелелиниң даргазы, Шолбан Ондар база кожууннуң чагырга даргазы Төлээлекчилер хуралының даргазы-биле кады аалдарже үнүп, кыштаглаашкынның ниити байдалын көрген.
“Кожуунда ниитизи-биле 160 малчын кыштаг бар. Оларның 120 хирезин кожуун чагыргазының төлээлери-биле хынап четтивис. Ниитизи-биле байдал ажырбас. Балгазынның аалдарынче оруктарны хадып каапканы-биле дугланган. Амгы үеде аштап-арыглаар ажылдар чоруп турар” – деп, Шолбан Ондар чугаалаан.
Малчыннарга база бир нарын айтырыгларның бирээзи – бөрүлер. Кыш эгезинден тура Таңды кожуунга 5 аът, 3 инек, 30 хире шээр мал бөрү аксынга барганын ол демдеглээн. Ук айтырыгны шиитпирлээри-биле хора чедирикчилерин аглап келген түңнелинде, 2 бөрүнү узуткаан. Амгы үеде бөрүлер оожургаан дээрзин көдээ ажыл-агый эргелелиниң даргазы чугаалаан.
Кышка белеткенип тургаш, Таңды кожуун ниитизи-биле 125 тонна сигенни белеткеп алган. Ынчангаш сиген талазы-биле чидиг айтырыг тургустунмайн турар. Тускай шериг операциязының киржикчилерин деткиири-биле, оларның өг-бүлелеринге сигенни 2–3 дүрүглеп берип турар. Ону алырда, кожууннуң көдээ ажыл-агый эргелелинге келгеш, билдириишкинни бижиир дээрзин Шолбан Ондар демдеглээн: “Чаа чыл байырлалының мурнунда база бо хонуктарда билдириишкин бижээн хамаатылар чогуур ужурлуг сигеннерин алганнар. Дыштанылга хүннериниң соонда база немей бээр сорулганы салдывыс. Ниитизи-биле 20 дүрүгнү ТШО киржикчилериниң өг-бүлелеринге үлээнивис ол”.
Ч. СААЯ
Буян ООРЖАКТЫҢ тырттырган чуруктары.
«Шын» №1 2024 чылдың январь 10
