Таӊдыныӊ кадрлар төвүнде

Таӊды кожууннуӊ Чонну ажылга хаара тудар төвү амгы үении-биле чаарттынган оран-савалыг.

Эрткен чылдыӊ декабрь 29-та байырлыг ёзу-биле ажыттынган кадрлар төвү чартык ай дургузунда 114 кижини хүлээп алган.
Чурагайлыг технологиялар-биле дериттинген, чаа эт-сеп-биле шиметтинген кадрлар төвүнге ажыл берикчилери-даа, ажыл чок хамаатылар-даа сонуургап кээп турар.

Интернеди доктаамал ажылдап турар болгаш, улус аӊаа чедип келгеш, «Россияда ажыл» деп порталга боттарыныӊ билдириишкинин кииргеш, тааржыр ажылдарны оон көрүп ап турарлар. Кадрлар төвүнде бичии уруглар булуӊун кылып каан. Чаш уруглары аӊаа ойнап-хөглеп турар аразында, авалары күрүнениӊ ачы-дуза хандырылгаларыныӊ ажыктыг медээлерин айтырып, билип ап болур.

«Ооӊ мурнунда Чонну ажылга хаара тудар төпке чүгле калькулятор-биле ажылдап турган бис. Калькулятор безин ажылдакчы бүрүзүнге турбаан чүве болгай. Ам магалыг-дыр, ажылдакчыларга-даа, келген улуска-даа эптиг, таарымчалыг байдалды тургузуп берген» – деп, Елизавета Куулар, кожууннуӊ Чонну ажылга хаара тудар төвүнүӊ баштайгы директору сактып чугаалаан. Ажылдаар чериниӊ иштин-даа, даштын-даа септеп кылып бергенинге, ажылдакчылар өөрүп, бедик тура-соруктуг ажылдап кирипкеннер.

Ажылдавайн турар кижилерге ажыл тып бээри, социал керээ-биле хуу сайгарлыкчы ажылды ажыдып алырынга дузалаары – кадрлар төвүнүӊ чедиишкинниг ажылыныӊ түӊнели.
Р. ДЕМЧИК.