Февраль 22-де Тываның күрүне университединге Россияның “Билиг” ниитилели Эрес-дидим чоруктуң кичээлин эрттирген. Дээди өөредилге чериниң студентилеринге 55-ки гвардейжи мото-адыгжы (даг) бригаданың шериглери ужурашкан. 2024 чылдың январь айда маадырлыг болгаш эрес-дидим чоруу дээш ук бригадага РФ-тиң Президентизи Владимир Путин “гвардейжи” деп хүндүлүг атты тывысканын сагындыраал.
“Билиг” ниитилелиниң төлээлери ТШО-да амгы байдалды болгаш чаңгыс чер чурттугларының маадырлыг, эрес-дидим чоруунуң дугайында чугаалап, боттарының чуруктарын болгаш видеоларын көргүскен. Оларның аразында дайынчы эмчи кижиниң амы-тынын канчаар камгалаарының дугайында практиктиг кичээлди эрттирген. Университеттиң аңгы-аңгы факультеттеринден студентилер чыглып келгеш, келген аалчыларны кичээнгейлиг дыңнап, оларның амыдыралга эргежок чугула дуржулгазын шиңгээткеннер.
“Дайын шөлүнде балыгланган дайынчыны канчаар чайладырын, бодунга болгаш балыгланган эжинге канчаар баштайгы эмчи дузазын чедирерин көргүзүп бердивис. Студентилер ону улуг сонуургал-биле көрүп, шенеп, боттарының сонуургаан айтырыгларын база салдылар. Аразында шериг кижиниң ажыл-амыдыралын сонуургаарлар хөй болду. Шак мындыг кичээлдер тайбың амыдыралга-даа эргежок чугула” – деп, Тываның “Кара барс” хөй-ниити албан чериниң даргазы, Россияның “Билиг” ниитилелиниң лектору Айдыс Куулар бүзүрелдии-биле чугаалады.
“Шак мындыг хемчеглер чүгле бистиң республикада эвес, чурттуң өске-даа булуңнарында база эгелээн. Февраль 19-тан 29-ка чедир чурттуң бүгү регионнарында Бүгү-российжи шериг-патриотчу “Билиг. Маадырлар” чырыдыышкын акциязы болуп эртип турар. Ооң киржикчилери бистиң үениң маадырлары-биле таныжып, ёзулуг шериг болгаш хамааты хүлээлгезин күүседип чораан кижилерниң боттарындан оларның төөгүлерин дыңнап турарлар” – деп, “Билиг” ниитилелиниң Тывада салбырының директору Эмина Кызыл-оол демдеглээн.
Байырлал мурнунда “Билиг” ниитилели янзы-бүрү хевирлерге 800 ажыг хемчеглерни организастаан. Аңаа келгеннер ТШО-нуң киржикчилери болгаш хоочуннары-биле дең эргелиг чугаалажып, патриотчу фильмнерни көрүп, сайгарып, лекцияларны дыңнап, викториналарны ойнап, ТШО киржикчилериниң өг-бүлелеринге чырыдыышкын марафоннарын, Эрес-дидим чоруктуң кичээлдерин эрттирип, Россияның Маадыры-биле кады шайлап турарлар. Шериг-өөредилге төптеринге лекция, экскурсия эрттирери хемчеглерниң база бир хевири апарган.
Ол ышкаш аныяк салгал Россияның төөгүзүнүң, чурттуң регионнарының дайынчы алдар-адының, ТШО болгаш ооң ёзулуг чылдагааннарының дугайында боттарының билиглерин калбартып турарлар. Боттарының ээлчээнде төөгүчүлер, политологтар, хөй-ниитижилер болгаш күрүне ажылдакчылары билиглери-биле үлежирлер.
Бүгү-российжи “Билиг. Маадырлар” шериг-патриотчу хемчеглерге киржири-биле “Билиг” ниитилелиниң сайтызынга бүрүткедип ап болур.
Чыжыргана СААЯ.
“Шын” №14 2024 чылдың февраль 24
