Хол кадыыры-биле сиген кезеринге “Тулган сиген кезикчизи” деп республика чергелиг маргылдаа Чөөн-Хемчик кожууннуң Хайыракан сумунуң сиген шөлүнге болуп эрткен. Аңаа Чөөн-Хемчик, Кызыл, Өвүр, Улуг-Хем, Чаа-Хөл, Барыын-Хемчик, Бай-Тайга, Сүт-Хөл кожууннардан ниитизи-биле 60 кижи киришкен.
Тываның Чазааның Даргазының агроүлетпүр талазы-биле оралакчызы Алик Моңгуш, ТР-ниң көдээ ажыл-агый сайыды Алдай-Мерген Ховалыг олар маргылдааның киржикчилеринге байырны чедирип, тиилелгелерни күзээннер.
Сиген кезикчилериниң аразынга маргылдаа үш хевирге эрткен: эр база херээжен улус аразынга, командалар аразынга. Маргылдааның эң улуг назылыг киржикчизиниң хары – 71.
Маргылдааның кол негелделери: сиген кезериниң дүргени, шынары.
Эр улустуң аразынга сиген кезеринге Улуг-Хем кожууннуң командазының кежигүнү Рафик Биче-оол тергиидээн. Сүт-Хөл кожуундан Бадый Сат ийиги черни чаалап алган, Улуг-Хем кожуундан Айдың Биче-оол үшкү шаңналдыг черге төлептиг болган.
Херээжен сиген кезикчилериниң аразынга Чаа-Хөл кожууннуң командазындан Урана Натпит ийиги черни, Сүт-Хөл кожуундан Артышмаа Ондар үшкү черни чаалап алгаш, Улуг-Хем кожууннуң төлээзи Сырга Оолакайга чемпионнаар арганы бергеннер.
Командалар аразынга сиген кезеринге маргылдаага бирги черни улуг-хемчилер чаалап алганнар. Сүт-Хөл кожууннуң командазы ийиги, Барыын-Хемчик командазы үшкү черни тус-тузунда үлешкеннер.
Келир 2024 чылда сиген кезеринге республика чергелиг маргылдааны бо чылгы тиилекчи команданың кожууну Улуг-Хем организастап эрттирер.
Республика чергелиг маргылдаага кожууннарның чамдыызының командалары киришпээни ону организастаанының кошкааның херечизи кылдыр демдеглеп болур.
ТР-ниң Көдээ ажыл-агый яамызының медээлеринден Ш. МОҢГУШ белеткээн.
"Шын" №58, 2023 чылдың август 5