Февраль 21-де В.Көк-оол аттыг Национал хөгжүм-шии театрынга Ада-чурт камгалакчызының хүнү уткуштур байырлыг хурал болуп эрткен. Аңаа Ада-чурттуң Улуг дайынының болгаш аңгы-аңгы чылдарда болгулап турган дайынчы хөделиишкиннер хоочуннары, амгы ТШО киржикчилери база погоннар эдилээн күштүг структуралар органнарының ажылдакчылары, чазак-чагырганың даргалары зал долдур чыглып киришкен.
Байырлыг хуралга ТР-ниң Чазак Даргазы Владислав Ховалыг чыылганнарга байыр чедиргеш, “Хөй чылдарда бүгү эр хиндиктиг чоннуң хүнү болу берген тайбың амыдыралдың байырлалы, бөгүнде тиилелге дээш демнешкен чаңгыс сорулгалыг бүгү чуртта чаа уткалыг байырлал апарган. Россияның Президентизиниң чарлаан Ада-чурт камгалакчызының чылы болганда, Февральдың 23 онзагай ужур-уткалыг. Улуг Тиилелгениң 80 чылынга тураскааткан бо чылда Ада-чурт камгалакчызының хүнү коргунчуг кыжаныгның мурнунга чоннуң эрес-дидим, туруштуг, чаңгыс демниг чоруун сагындырып турар. Келир салгалдарның хостуг тайбың чуртталгазы дээш амы-тынын берген сая-сая кижилерниң маадырлыг чоруунуң ачызында тиилелге чедип алдынган”— деп, Владислав Ховалыг онзалап демдеглээш, шаңналдар тыпсыр ёзулалды РФ-тиң Президентизиниң чарлыы ёзугаар Ада-чурттуң Улуг дайынының хоочуннарынга “Тиилелгениң 80 чылы” медальдардан эгелээн. Хуралга чаладып келген тылдың болгаш дайынның маадырлыг киржикчилерин олудундан тургуспайн, боду чанынга четкеш, кадагылап берген. Зал долдур олурган улус шупту туруп келгеш, хүндүткелдиң мөгейиин илередип, изиг адыш часкаашкыннары-биле үдеп турган. Хүндүлүг хоочуннарның аразында Ада-чурттуң Улуг дайынының үезинде 3-кү Беларусс фронтузунуң киржикчизи, эрес-дидим чоруктуң үлегери болган 98 харлыг Георгий Васильевич Абросимов туруп келгеш, Тиилелгениң юбилейлиг медалын улуг хүндүткел-биле хүлээп алган.
Владислав Ховалыг Ада-чурттуң камгалакчызының хүнү кижилерниң хей-аъдының күчү-күжүн, эрес-дидим чоруун, Ада-чуртунга кызыгаар чок бердингенин көргүзүп турар дээрзин демдеглээш, ТШО-га эрес-дидим чоруу-биле шылгараан дараазында киржикчилеринге Россияның болгаш Тываның күрүне шаңналдарын тывыскан:
РФ-тиң Президентизи Владимир Путинниң чарлыы-биле улуг лейтенант Шораан Олегович Ооржакка дайынчы хүлээлгезин күүседиринге маадырлыг, эрес-дидим болгаш бодун хайыравас чоруу дээш «Эрес-дидим чорук дээш» медальды;
55-ки аңгы гвардейжи мото-адыгжы (даг) бригаданың улуг лейтенантызы Милан Тоюн-оолович Дагбыга шериг хүлээлгезин күүседип тура маадырлыг, эрес-дидим болгаш бодун хайыравас чоруу дээш, «Эрес-дидим чорук дээш» 2-ги чергениң медалын тывыскан.
ТР-ниң Иштики херектер яамызының кеземче истелге эргелелиниң начальнигиниң оралакчызы – оперативтиг агент ажылын организастаар, оперативтиг-истелге ажыл-чорудулгазын деткиир база информация талазы-биле эргелелиниң начальниги, полицияның подполковниги Кежик Владимирович Монгушка Тываның Баштыңының Өөрүп четтириишкин бижиин тывыскан.
Албан ажыл-чорудулгазынга бедик мергежилдиг болгаш чедип алган эки үре-түңнелдери дээш Тываның Баштыңының Хүндүлел бижии-биле:
Иштики албанның капитаны, Федералдыг суд приставтарының Тыва Республикада эргелелиниң килдис даргазы Чингис Петрович Калзанны;
Россияның ФАА-ның Тыва Республикада Кызыгаар эргелелиниң чолаачызы, улуг прапорщик Александр Александрович Лукинни шаңнаан.
Шериг хүлээлгезин күүседиринге көргүскен маадырлыг, эрес-дидим болгаш кызымак чоруу дээш «Тускай шериг операциязының киржикчизи» медаль-биле дараазында шылгарааннар:
«Тыва Республиканың шериг комиссариады» федералдыг күрүне албан чериниң улуг специалист-экспертизи, биче лейтенант Айбулат Уран-Маадырович Куулар;
55-ки аңгы гвардейжи мото-адыгжы (даг) бригаданың гвардияның улуг сержантызы Артыш Борисович Очур-оол;
«Тыва Республиканың шериг комиссариады» федералдыг күрүне албан чериниң күрүне чажыттарын камгалаар кезээниң начальниги, капитан Владислав Витальевич Потехин;
55-ки аңгы гвардейжи мото-адыгжы (даг) бригаданың гвардияның сержантызы Аңчы Олегович Успун шаңнаткан.
Болган байырлыг хуралга Владислав Ховалыг совет шериг каттыжыышкыннарының составынга фронтуга тулчуп чораан чаңгыс чер-чурттугларывыска, тыва эки турачыларга – аъттыг шериглерге, танкычыларга болгаш ужудукчуларга, Тыва Арат Республикага чурттап чораан муң-муң совет хамаатыларга сактыышкыннарны мөңгежидер талазы-биле чорудуп турар ажылдың дугайында чугаалаан. Оларның аттарын Кызылдың Тиилелге шөлүнге тураскаалдарда сиилбип каан. Амгы үеде маадырларның даңзызын немей киирер ажылдар чоруп турар.
Ленинград чоогунга маадырлыы-биле тулчуп чораан Тываның орус оолдары – Шумов алышкыларга тураскаалды Кызылга тургузар төлевилелди Россияның шериг-төөгү ниитилели-биле кады боттандырып эгелээнин демдеглээн.
Сорунза МОНГУШ.
Чиңгис СААЯНЫҢ тырттырган чуруу.
«Шын» №7 2025 чылдың февраль 27
