Улуг Тиилелгениң 78 чыл болган оюн бөгүн бүгү Россияда демдеглеп турар. Дайзынны чылча шапкан өөрүшкүлүг хүнден бээр, 78 чыл шуужа бергени ол. Майның 9-у кээрге-ле, чурттуң улуг-биче чону байырлаар, ойнаар-хөглээр, адаан-мөөрейлежири чаңчыл апарган.
Кызыл хоорайда В.Биче-оол аттыг Хүреш стадионунда Улуг Тиилелгениң 78 чыл болган оюнга тураскааткан республика чергелиг тыва хүреш маргылдаазы эгелей бергенде, тырттырар бөлүк-биле бардывыс. Шөлде содак-шудаан, тыва идиин кеткен мөгелер ачыр-дачыр тутчуп турлар. Бодунуң онаан октап алган мөге Россияның болгаш Тываның тугун долгандыр, эзир дег, чоргаары кончуг девип каап чоруп тур.
Субудай Монгуш, ТР-ниң спорт сайыды:
- Улуг Тиилелгениң 78 чыл болган оюнга тураскааткан чаңчыл болган тыва хүреш маргылдаазы эгелей берди. Улуг сонуургал-биле республикавыстың 111 шыырак мөгелериниң чараш аргаларын көрүп эгеледивис. Кожавыс Моолдан келген дөрт мөге база боттарының чараш оюнун биске көргүзүп тур. Оюн солун болур дээрзи чугаажок. Ам-даа дөрт хире шак дургузунда уламчылаар боор.
Маргылдааның түңнелдерин болгаш шаңналдарын «Шын» солуннуң дараазында үндүрүлгезинден номчуп болур.
А.ОНДАР.
Начын АҢГЫР-ООЛДУҢ тырттырган чуруктары.
