Чылдың-на Ада-чурттуң Улуг дайынынга Тиилелге хүнүнге уткуштур “Тиилелгениң диктантызы” деп акцияны бүгү чуртка эрттирип турар. Ооң утказы тайылбыр чокка-ла билдингир. Улуг Тиилелгениң үнезин Россияның чурттакчы бүрүзү билген турары чугула.
Апрель 24-те “Тиилелгениң диктантызы” акцияга Тыва каттышкан. Аңаа республиканың муң ажыг чурттакчызын хаара туткан. Чүс үжен ажыг шөлчүгешке чазак-чагырга төлээлери, тускай шериг операциязының киржикчилери, депутаттар, школачылар, студентилер, эки турачылар, хөй-ниити организацияларының төлээлери дээш өскелер-даа “Тиилелгениң диктантызын” бижээн. Диктантыда 25 айтырыгның аразынче тускай шериг операциязының дугайында айтырыгларны бо чылын киирген.
Тываның Алдан-Маадыр аттыг национал музейи – Кызылга диктант бижиириниң база бир кол шөлчүгежи болган. Аңаа киржири-биле келген кижилерниң аразында Россияның Маадыры, «Тываның маадырлары» кадрлар программаның киржикчизи Буян Куулар база бар.
“Тиилелгениң диктанты- зы” – “Чаңгыс демниг Россия” партияның улуг хемчээлдиг чырыдыышкын акциязы. Сес дугаар чыл эртип турар акцияны бо чылын Ада-чурттуң Улуг дайынының эгелээниниң 85 чылынга база Совет Эвилелиниң маршалы Георгий Жуковтуң төрүттүнгенинден бээр 130 чыл оюнга тураскааткан. Ооң-биле чергелештир бүгү чуртта «Маадырга чагаа» деп чугула акция эртип турар. Бистиң школачыларывыс мурнуку одуругда дайынчыларга чагааларны бижээн" – деп, ТР-ниң Дээди Хуралының Даргазы Каң-оол Даваа чугаалаан.
Ада-чурттуң Улуг дайынының база амгы тускай шериг операциязының төөгүзүн шын билип, дайынчыларның маадырлыг чоруун утпазы чугула дээрзин диктант бижикчилери онзалап демдеглээн. Шак мындыг акциялар өзүп олурар салгалдарга Улуг Тиилелгениң үнезин билип алырынга дузалыг.
Бистиң корр.
Ада Тюлюштуң тырттырган чуруктары.
“Шын” №16 2026 чылдың апрель 30
"Шын" солуннуң МАХ-каналынга каттыжыңар max.ru/join/egenQ...