«Айыыл чок оруктар» деп Бүгү-российжи олимпиада доозулган. Учи.Ру. деп платформага эрткен Бүгү-российжи онлайн-олимпиадага Тываның шупту булуңнарындан 1-ден 11 класс өөреникчилери 9000 хире уруг киришкен.
Олимпиада үезинде орук шимчээшкининиң дүрүмнеринге хамаарышкан практиктиг арга-мергежилдер база логиктиг угаан-бодалче угланган онаалгалар уругларга дыка солун болган.
Олимпиаданың түңнелинде, 74 школачы тиилекчи болган.
Муниципалдыг тургузуглар аразындан эң-не тергиин болгаш эң-не идепкейлиг кожууннарга Эрзин, Тес-Хем, Улуг-Хем, Сүт-Хөл, Чеди-Хөл, Таңды, Тожу, Өвүр база Ак-Довурак хоорай хамааржыр. Тиилекчилерге деткимче мактал кылдыр чырык чайыннандырар тускай жилеттерни тывыскан.
«Айыыл чок оруктар» деп олимпиаданы чылдың-на эрттирип турар. Ооң киржикчилери чылдан чылче көвүдеп, эрткен чыл-биле деңнээрге, киржикчилер саны ийи катап өскен.
ТР-ниң Өөредилге яамызының медээлеринден.
«Шын» №87 2023 чылдың ноябрь 15
