Бо хүн театр чанында тиккен чеди ханалыг ак өг иштинге бир дугаар тоолду ыткан. Тываның алдарлыг артизи Сайдаш Монгуштуң салганы «Сыгырга» деп шиизинде ойнап турар бичии чаштар тоолчунуң бирги аалчылары болган.
Тыва театрның эртинелери Россияның алдарлыг болгаш Тываның улустуң артизи Анзат Куулар база Тываның улустуң артизи Виктор Наксыл өгнүң аалчыларын уткуп, изиг сүттүг шайын кудуп, боорзак, боовазын сунуп хүлээп алганнар.
Өгнүң тоолчузу Начын Салчак бичии чаштарны тоолдарның аңгы-аңгы хевирлери-биле таныштыргаш, оларга хайыракан, кокай, дилги болгаш кажар угаанныг бай дугайында хуулгаазын тоолун ыдып берген. Оон аңгыда уругларга «Ак-Сагыш биле Кара-Сагыш» деп тыва улустуң база бир сураглыг тоолдарының бирээзин кончуг солун кылдыр ыдып бергени улуг өөрүшкү болган.
В.Көк-оол аттыг Национал хөгжүм-шии театрының медээлери-биле.
