Далай‑Мерген Хомушку — Өвүр кожууннуң спорт школазының тренер башкызы.
Болганчок-ла «аныяк специалист» дептерге-ле, дуржулга чок кылдыр бодай бээр болгай. Ынчалза-даа Далай-Мерген Хомушку аныяк-даа болза, профессионал дуржулгазы улгаткан, эки чедиишкиннерлиг база коллегаларының, спортчуларның болгаш өөреникчилериниң хүндүткелин чаалап ап четтигипкен.
Ооң ажылынга чогаадыкчы аргалары бир онзагай: эрес-орлан боорда, шиитпирлии, бодамчалыы, угаангыры башкы ажылынга дүгжүп турар.
Өөреникчилериниң чедиишкиннери ооң ажылын бадыткап турар. Далай-Мерген Макаровичиниң удуртулгазы-биле Өвүр кожууннуң спорт школазының мөгелери кожуун болгаш республика чергелиг маргылдааларга шаңналдыг черлерден дүшпейн, региондан дашкаар республиказын төлептиг төлээлеп, бедик деңнелдиг маргылдааларның тиилекчилери болуп турар.
Далай-Мерген Хомушку чүгле тренер эвес, ол ёзулуг дагдыныкчы. Ол өөреникчилерин чурумга, удурланыкчызынга хүндүткелдиг, тиилелгеже чүткүлдүг болурун өөредип турар.
/ Бистиң корр.
Медээни болгаш чурукту ТР-ниң Спорт яамызының социал четкиде арнындан алган.
“Шын” №26 2026 чылдың июль 9
"Шын" солуннуң МАХ-каналынга каттыжыңар: max.ru/join/egenQ...