Кызыл кожууннуң төвү Каа-Хем суурда 2012 чылда тудуп эгелээн 7 муң көрүкчү кире бээр улуг спортчу-культура төвүнүң тудуунуң дагын эгелээр дээнин ТР-ниң Спорт яамызының оралакчы сайыды Субудай Оюн дыңнаткан:
“Тудугнуң чүге саадап турарынга хамаарыштыр чугаалар болза, кол чылдагааны – акшаландырыышкын айтырыының нарын болуп келгенинде. 2018 чылда күрүне чагыы-биле 1 миллиард 217 сая рубльга керээ чардынган турган. Ол акша-түң улуг комплекстиң чүгле ханаларын тудуп үндүреринге чедишкен. Оон аңгыда иштики ажылдары, инженер четкилери, изиг-соок суг хандырылгазы дээш өске-даа ажылдарже акша чедишпейн барган. Эрткен чылын Россияның спорт яамызының “Спорт-амыдыралдың хевири” регионалдыг программазын таварыштыр 320 сая рубльди бистиң яамывыс камгалап алган. Ол акша тудугну уламчылаар арганы берип турар-даа болза, долузу –биле доозарынга ам-даа немей акшаландырыышкын херек болуп турар. База бир нарын байдал, бо хүнде тудуг материалдарының өртээниң өскени база улуг рольду ойнап, мурнунда көрдүнген акшаландырыышкынның чедишпейн турарының бир чылдагааны болуп турар. Ниитизи-биле бо тудугну 2024 чылда доозар деп сорулга салдынган” – деп, Субудай Оюн тайылбырлаан.
Тудугнуң саң-хөө хандырылгазы, чоруттунар ужурлуг ажылдарга хамаарыштыр чогуур тайылбырны ТР-ниң тудуг сайыдының хүлээлгезин күүседип турар Аяс Хунай-оол берген:
“2019 чылда бистиң яамыны таварыштыр бо тудугга федералдыг деткимче кылдыр 1 миллиард 66 сая рубльдиң акшаландырыышкынын чоруткан. Бо чылын 313 сая рубльга ийи керээни чаргаш, ТР-ниң Спорт яамызы-биле дугуржулганы кылган. Ол акша ийи чыл дургузунда тудугну доозарынче көрдүнген ажылдарже чарыттынар. Оон аңгыда тудугнуң инженер четкилеринче болгаш ону долгандыр чаагайжыдылга ажылдарынче 450 сая рубль хереглеттинип турар. Бо акша-түңнү дилеп-тывар талазы-биле ажылдарны Спорт яамызы чорудуп турар. Оон аңгыда бо төптүң турар черин долгандыр девискээрге “Преображенский” микрорайонун тудары көрдүнген. Ынчап кээрге, бо улуг тудугну таварыштыр бүдүн микрорайоннуң суг, чылыдылга хандырылгазы база оон улажыр болганда, канализация коллекторунуң ажылының механизимин ажылдап кылып турар бис. “Чурттаар оран-сава болгаш хоорай хүрээлеңи” национал программаже кирип турар “Арыг суг” төлевилелдиң боттанылгазының ачызында ол ажылдарны чорудуп эгелээн. Ынаар 6 сая хире рубль хереглеттинип турар. Бо бүгү ажылдарны ийи чылда планнаан. 2024 чылда доозар ужурлуг бис” – деп, тудуг адырының удуртукчузу түңнээн.
Чоннуң үрде манааны чараш оран-сава 2024 чылда ажыглалче кире бээр болза, республиканың база бир көскү, хөй чон чыглыр чери болу бээри чугаажок.
#Шынсолун#ТР_ниңСпортяамызы #ТР_ниңТудугяамызы#Cпортчу_культуратөвүнүңтудуу
Тудугну 2024 чылда доозар дээн
21 апреля 2023
28