Тудугжуларның ажылының үнелели кайыл?

Бис Кызыл хоорайның Правобережная кудумчузунуң 20/1 дугаар бажыңының чурттакчылары бис. “Жильё” компанияга үр чылдарда ажылдап келген тудугжулар-дыр бис. Амгы үеде назы-харывыс улгадып, хүндүлүг дыштанылгаже үнүп, кадыкшылывыс баксырап, арга-шинээвис-даа кошкаан. Хөй кезиивис тудуг адырындан хүндүлүг дыштанылгаже үнген. Эрги даргавыс В.А. Гавриленко кадыкшылы баксырааш, мөчээн соонда ооң оолдары Д.В. биле С.В. Гавриленколар ук компанияны удурту бергеннер.

Ниити чуртталга бажыңын септеп бээрин дилээривиске, бажың эргижирээнинден септеттинмес, аварийлиг байдалда келген дээрзин чугаалааш, эрте дээре өске чурттаар оран-савадан диленип азы бо чурттап олурар өрээлдерни садып, хуужудуп алырын дыңнаткан болду. Даргалар боттары-даа биске ужуражып келбээн, ол дугайында доктаал-саавыр-даа көргүспээн.

20–30 чылдар дургузунда хоорайда чуртталга бажыңнарын, школалар, уруглар садтары, суд черлери дээш өске-даа албан черлерин, коттеджтерни туткан бис. Бистиң кылган тудугларывыс санаттынмас хөй. Үстүнде айыттынган, ыяштан кылган 1 каът ниити чуртталга бажыңында 20 өрээл бар. Ында шупту тудугжулар чурттап турар. “Аварийлиг оран-сава” деп программаже кирип алыр дээш, кайнаар барбаан дээр. Хууда өнчүнү канчап-даа шыдавазын даргалар, депутаттар чугаалаар болду. Ам каяа чурттаар улус боор бис?

Тудугжу дээрге эң-не берге мергежилдерниң бирээзи дээрзин кижи бүрүзү билир боор. Бөдүүн тудугжу чоннуң эрге-ажыы турар болгу дег. Ону кым камгалап шыдаарыл? Хөй чылдар дургузунда ажылдап келгеш, кымга-даа херек чок болганывыс ол бе? “Аварийлиг оран-сава” программазынче кирер эргевис бар бе?

Правобережная кудумчузунда 20/1 дугаар бажыңның чурттакчылары.

"Шын" №55, 2023 чылдың июль 26