Тываның Чазаа онза байдал чурумунуң үезинде республика иштиниң авиарейстеринче чиигелделиг тарифтерниң хемчээлин, ол ышкаш иштики авиааргыжылга тарифтерин бадылаан.
Кызыл — Тоора-Хем аразынга МИ-8МТВ база АН-2 самолеттарга чиигелделиг авиабилет өртээ — 2 184 рубль, Кызыл — Чазылары (Хамсара) — 3 272,10 рубль, Тоора-Хем — Чазылары (Хамсара) — 1 092 рубль, Кызыл — Ырбан — 2 727,40 рубль, Тоора-Хем — Ырбан — 546 рубль, Кызыл — Кунгуртуг — 3 272,10 рубль, Кызыл — Соңгу Аржаан — 10 000 рубль (МИ-8МТВ бортка) база 7 500 рубль (АН-2-ге), Кызыл — Мугур-Аксы — 4 364,10 рубль кылдыр доктааттынган.
Тываның Тожу, Тере-Хөл база Мөңгүн-Тайга кожууннарның доктаамал чурттакчылары база доктаамал киир бижидилгелиг хамаатылар чиигелделиг тариф-биле аай-дедир чоруур эргелиин документиде айыткан. Тывада 18 хар чедир назылыг бичии уруглар, 55 хардан өрү назылыг херээжен, 60 хардан өрү назылыг эр кижилер, I бөлүктүң инвалидтери, чажындан-на II азы III бөлүктүң инвалидтери база оларны эдертип чоруур кижилер ол чиигелдени алыр. Ол кожууннарда санаторийлерге база курорттарга эмнедир путевказы бар республиканың чурттакчылары авиатранспортче чиигелделиг билетти садып алыр эргелиг. Тожу кожууннуң Чазылары суурда ажыткан реабилитация төвүнче бар чыдар, тодаргай чурттаар чери чок хамаатылар база чиигелдени ажыглаар. Ыраккы кожуунга күрүне даалгазын база ажылын күүседир дээн күрүне органнарының ажылдакчылары субсидиялыг билет садып алыр эргелиг.
Республикада онза байдал чурумунуң үезинде иштики сес авиаугланыышкынга чартык өртектиг база доктааткан чиигелдеден-даа эвээш өртектиг тускай тарифтер ажылдаар. Чижээ, Кызылдан Тоора-Хемче — 1092 рубль, Кызылдан Чазыларыже — 1636,05 рубль, Тоора-Хемден Чазыларыже — 546 рубль, Кызылдан Ырбанче — 1363,70 рубль, Тоора-Хемден Ырбанче — 273 рубль, Кызылдан Кунгуртугже база Соңгу Аржаанче — 1636,05 рубль, Кызылдан Мугур-Аксынче — 2182,05 рубль-биле ужуп болур.
Онза байдал чурум киирген девискээрлерлиг кожууннарда доктаамал чурттап, киир бижидилгелиг, 18 хар чедир назылыг уруглар, пенсия назылыг эр база херээжен улус, кадыының байдалы кызыгаарлыг кижилер база оларны үдеп чоруур, республикада бүрүткелдиг кижилер тускай тариф-биле билеттерни садып алыр. Доктаал езугаар оон аңгыда, хенертен бир чүүлге таварышкан – орнукшудулга, назылаан төрелдеринге, кадыының байдалы кызыгаарлыг кижилерге, аъш-чем азы эмнер чедирип бээр хамаатылар тус чер бот-башкарылга органнарының чөпшээрели-биле ОБ чуруму чарлаан кожуунче ужар чиигелдени алыр.
Сөөртүкчүнүң доктааткан нормазындан ажа берген деңзилиг азы санныг “нормадан эрткен чүъкке” чиигелделиг тарифти база бадылаан. Тываның үш кожуунга суг үерлээнинден онза байдалды чарлаанын сагындыраал. Тус черниң ажыл-агыйларынга суг халавының чедирген когаралының хемчээлин баш бурунгаар санаан соонда, Тываның Баштыңы Владислав Ховалыг бүгү регионнуң девискээринге онза байдал чурумун киирер шиитпирни хүлээп алган.
/ Тываның Чазааның парлалга албаны.
"Шын" №45 2023 чылдың июнь 21