Декабрь 27-де Бир дугаар каналга “Жить здорово!” деп дамчыдылгага Тывада Чаа чылды канчаар байырлаарының онзагайларының дугайында чугаалап турган. Телебашкарыкчы Елена Малышева көрүкчүлерге тыва Соок-Ирей-биле таныштырган. Ооң ролюн Тываның улустуң артизи Станислав Ириль ойнаан. Башкарыкчы улаштыр тыва Чаа чылдың ёзу-чаңчылдары-биле көрүкчүлерни таныштырган. Тыва Республиканың Даргазының оралакчызы, Москва хоорайда ТР-ниң бүрүн эргелиг төлээзи Чечен Чоксум ай санаашкыны-биле Чаа чылдың – Шагаа байырлалының ёзу-чаңчылдарының дугайында чугаалап берген.
Оон ыңай дамчыдылгага Тыва культура төвүнүң ажылдакчызы Шончалай Чолдак-оол тыва национал аъш-чемни таныштырган. Программаның башкарыкчылары Герман Гандельман, Андрей Продеус, Михаил Коновалов тыва хой эъдиниң кадыкшылга ажыктыын тайылбырлаан.
Ук теледамчыдылгага Москва хоорайда ТР-ниң Бүрүн эргелиг төлээ чериниң ажылдакчылары, Тыва культура төвүнүң коллективи, А.Б. Чыргал-оол аттыг Кызылдың уран чүүл колледжизиниң “Азас” ансамблиниң киржикчилери база киришкен.
ТР-ниң төлээлериниң мурнундан “Жить здорово!” деп дамчыдылганың Чаа чылдың үндүрүлгезинге киржиринче чалааны дээш Елена Малышевага болгаш Бир дугаар каналдың удуртулгазынга өөрүп четтиргенин илереткен. Телекөрүкчүлерге байырланчыг сеткил-хөөннү сөңнээн боор бис деп идегедивис.
Силер бүгүдеге үнүп олурар Чаа чыл-биле!
Бистиң корр.
«Шын» №100 2024 чылдың декабрь 28
