Москва хоорайга, ноябрь 12-де чайгы спорт ордузунга, элезин кырынга хүрешке Россияның 3 дугаар чемпионады болган. Аңаа 70, 80, 90-дан өрү килдерге шыырак дээн 49 спортчу хүрешкен. Бистиң республикадан 4 мөге база 3 тренер чедиишкинниг киришкеннер. Бо маргылдааның кол сорулгазы — элезин кырынга хүрешти Россияга сайзырадыры.
Элезинге хүрештиң хевирин база дүрүмнерин тайылбырлап бээри-биле, бистиң республиканың төлээлери, спортчу хүрештерниң президентизи Буян Бурбучук, оралакчылары Айдаш Самдан база Саток Кенден олар-биле ужуражып чугаалаштывыс. Кол сорулга болза, бистиң республиканың спорт сайыды Субудай Монгуш база Россияның спортчу хүрештер чөвүлелиниң президентизи Георгий Мамиашвилиниң “Пляжка хүрешти” Россияга сайзырадыры болур.
Элезинге хүрештиң хевири — 9 дөрбелчин метр иштинге, кылыны 10 см элезинге хүрежир. Ол хостуг хүреш, бурят, якут база оон-даа өске чоннарның хүрештери-биле дөмей болуп турар. Дүрүмү — 2 катап 3 минута хүрежир, хевистен 3 катап үнер болза, база хевис иштинге улуг чартыы-биле дүжерге, ойнаткан болур. Бо хүреш чылыг чурттарда шагда-ла сайзыралын алган. Сенегалга 2026 чылда 16 харлыг оолдар, уруглар Олимпиадазынга элезинге хүрешти киирер болган.
Москвага чемпионаттың түңнелинде, бистиң мөгелеривис Бурятияның командазын 4 биле 4 санга шынар талазы-биле ажып, командазы бирги черни база Кубокту алганнар. Килдер аайы-биле: 70 килге Эзир Түлүш 2-ги черни, 80 килге Хемчик-оол Салчак 3-кү черни, 90 килге Александр Доржу 2-ги черни, 90-дан өрү килге Бады-Маадыр Самдан 1-ги черни алган.
Тулган тиилекчи хүрежинге Бады-Маадыр Самдан 2-ги черге, Александр Доржу 3-кү черге төлептиг болганнар.
Алексей ЧАМБАЛ-ООЛ.
Авторнуң тырттырган чуруктары.
«Шын» №90 2023 чылдың ноябрь 25
