ӨРТТЕР
Кат-чимис, тоорук бышканы-биле холбаштыр арга-арыг кирип каттаар, тайгаларже үнүп, тооруктаар кижилер көвүдээн.
Оларның агаар-бойдуска кам-хайыралыг эвес, от-биле оваарымча чок чоруунуң хайында арга-арыглар, тайгаларда өрттер бо-ла хып үнүп турар апарган. Сентябрь айда Тываның арга-арыгларынга 18 өрттер хып үнген, ниити шөлү 495,3 га арга-арыг девискээри өрттенип, үнүштерге, черлик дириг амытаннарга, курт-кымыскаякка хораны чедирген.
Ынчангаш республикада өрттер-биле байдалды Тыва Республиканың прокуратуразы шыңгыы кичээнгейге алган. Бо хоойлу-дүрүм органының негелдези-биле 2022 чылдың сентябрь 7-ниң хүнүнден эгелеп өрттерге удур онза шыңгыы байдалды республиканың девискээринге чарлаан.
Өрттерниң хып үнген чылдагааннарын улам тодаргай илередир, аңаа буруулуг болган кижилерге кеземчени онаары-биле Бии-Хем, Улуг-Хем, Тес-Хем, Эрзин, Чөөн-Хемчик, Таңды, Чеди-Хөл, Чаа-Хөл, Каа-Хем, Тожу кожууннарның прокурорлары өрттерге удур хемчеглерниң негелделерин, чурттакчы чонну болгаш долгандыр хүрээлелди өрттерден камгалаарының хемчеглерин канчаар сагып болгаш күүседип турарының талазы-биле хыналдаларны амгы үеде чорудуп турар.
Өрттерни болдурбас болгаш хып үнген өрттерни дүрген өжүрер, оларны өжүреринге машина-техника болгаш кижи курлавырын четчир кылдыр хандырарынче шыңгыы кичээнгейни салыр сагындырыгны республиканың арга-ыяш ажыл-агый болгаш бойдус курлавырларын ажыглаарының сайыдынга прокуратура берген.
ОРУК ОЗАЛ-ОНДАА
Кунгуртуг – Эрзин автомобиль оруунуң Эрзин кожуунда участогунга 2022 чылдың сентябрь 7-ниң хүнүнде автотранспорт озал-ондаа болган.
“Урал” марканың аар чүък машиназын чолаачызы оруктуң кадыр-берт черинге башкарып чадай бергенинден автомашина аңдарылган. Ооң уржуунда чолаачы ол-ла черге амы-тынындан чарылган, кемдеп-кергээн алды пассажирни республиканың № 1 эмнелгезинге дүрген чедирип, эмчи дузазын көргүскен.
Республика прокурорунуң даалгазы-биле Эрзин кожууннуң прокурору озал-ондактың болган чылдагааннарын тодаргайлап, орукка шимчээшкинниң айыыл чок чоруунуң негелделерин сагып турганының хыналдазын чорудуп турар.
Чурукт интернеттен алган.