Тыва Республика бо чылын чеди дугаар болуп эртип турар делегей чергелиг «Сактыышкынның сады» акцияга киржир. Апрель 21-де эгелээр акция республиканың чурттакчыларын чугула болгаш ханы ужур-уткалыг хемчег-биле Төрээн чурту дээш амы-тынын берген маадырлар дугайында сактыышкынын кадагалап арттырары-биле демнештирер.
Акцияның кол сорулгазы – Ада-чурттуң Улуг дайынының үезинде мөчээн кижи бүрүзүнге тураскаадып, 27 сая ыяштарны тарып олуртуру. Бо чылын акцияны бистиң үениң маадырларынга — бо хүнде чурттуң бот-догуннаашкынын камгалап турар тускай шериг операциязының киржикчилеринге база тураскааткан.
«Тываның муниципалдыг тургузуглар девискээрлеринге акция-биле 3 муң ажыг ыяштарны тарыыры планнаттынган. Оон аңгыда республиканың арга-арыг фондузунуң черлеринге 1 сая 196 муң ыяштарны тарыыр» - деп, регионнуң Арга-арыг ажыл-агый болгаш бойдус яамызы дыңнаткан.
Май 19-та Кызылдың арга-арыг ажыл-агыйының девискээринге акцияның кол хемчээ болуп эртер. Ында 10 гектар черге 20 муң ажыг анаа хадыларны олуртур. Күзелдиг кижи акцияга киржип болур. Ынчаарда «Сактыышкынның сады» деп албан езузунуң сайтызынга бүрүткедип алгаш, интерактивтиг картадан таарымчалыг черни шилип алыр.