“Сүбедей” спорт өргээзинге март 30–31 хүннеринде Сибирь федералдыг округтуң ММА чемпионады 86 спортчунуң киржилгези-биле бедик деңнелге болуп эрткен. Аңаа бистиң республикадан 12 шилиндек спортчу киришкен. Чемпионаттың кол шииткекчизи Новосибирск хоорайдан Сергей Яковлев. Чемпионат хөй спортчуларны база көрүкчүлерни хаара тудуп, спорттуң бо хевири бистиң республикада сайзырап турарының көскү демдээ.
Маргылдааның ажыдыышкынынга хүндүлүг аалчылар – кол шииткекчи Сергей Яковлев, секретары Евгений Гезрьянов, ТР-ниң спорт сайыдының оралакчызы Саян Монгуш – спортчуларга кадыкшылды болгаш бедик спортчу чедиишкиннерни күзээннер.
Ийи хүннүң дургузунда нарын ужуражылгаларның түңнелинде, бистиң спортчуларывыс дараазында түңнелдерни көргүскеннер: 52,2 килге шупту шаңналдыг черлерни тыва спортчулар алган – Оттук Сегбелдей, Сайын-Херел Кончукпан биле Сайдаш Бадыбалар, 56,7 килдиг спортчулар аразынга 3 черге Айслан Хертек, дараазында 61,2 килге 3-кү черлерни Темир Күжүгет база Алексей Монгуш үлешкеннер, 65,8 килге 3-кү черлерни Найыр Сандакпан база Маадыр Херлии үлешкеннер, сөөлүнде 120 килден аар килге удурланыкчы чок болганындан Ай-Хаан Монгуш чемпион атка төлептиг болган. Түңнелинде, командалар аразынга 1-ги черни Тываның командазы, 2–3 черлерде Омск, Кемерово областарының командалары болганнар.
Тренерлерниң негелделиг удуртулгазы-биле спортчуларның уйгу-дыш чок, карак кызыл белеткелиниң түңнелинде, тыва спортчуларның командазы шылгарааш, бирги черни ап, чемпионаттың Кубогун чаалап алганнар. Оон улуг өөрүшкү кайда боор, ол дээрге чүгле спортчуларның, тренерлерниң эвес, а бүгү тыва чоннуң ат-алдары болур.
Шииткекчилерге чамдыкта кымга тиилелгени бээри безин берге болуп турган. Чүге дээрге спортчуларның Россия чемпионадынга киржир дээш путевка алыр дээн күзели күштүг болган.
Республикада ММА чөвүлелиниң удуртукчузу Александр Ховалыг чемпионатка белеткел үезинде улуг дузаны чедиргени дээш Спорт яамызынга, спортчу маргылдаалар эрттирер эргелелге, “Сүбедей” спорт школазынга, Культура яамызынга база харыысалгалыг үеде дуза чедирген эш-өөрүвүске четтиргенивисти илереттивис.
Сибирь федералдыг округтуң ММА чемпионадын Тывага эрттирерин бистиң берге аарыгдан аараан эживис Денис Шалавинниң улуг күзели чораанын демдеглевишаан, бис, эштери, ону шыдап, күзелиңни боттандырдывыс. А сен ол берге аарыгны тиилериңни күзедивис. Бис шупту сээң-биле кады бис. База тыва чоннуң, деткикчилерниң мурнундан ММА спортчуларынга Россия чемпионадынга төрээн Тывазын база Сибирьниң ады дээш эки белеткенип, чедиишкинниг киржирин күзээн.
А.Чамбал-оол.
Авторнуң тырттырган чуруктары.
«Шын» №25 2024 чылдың апрель 3
