Свердловскунуң 6 дугаар школазының спорт залынга барык 6 чыл дургузунда күш-культура кичээлдери эрттирер эптиг байдал тургустунмайн турган. Бөгүн, октябрь 28-те, школаның коллективинге, өөреникчилеринге, тус черниң чурттакчы чонунга канчаар-даа аажок өөрүнчүг болуушкун – үрде манааны күш-культура кичээлдери эрттирер залы ажыглалче кирип, ажы-төлге таарымчалыг байдалды тургускан.
2023 чылда Тываның Баштыңы Владислав Ховалыг округтуң удуртулгазы-биле дугуржулга ёзугаар школаның спорт залын чаартыр ажылдарны чорудуп эгелээн. Хүлээникчи организация «Бастион» КХН болгаш тус черниң ажылдакчылары чаартылга ажылдарын кончуг шудургу болгаш шынарлыг кылып өй-шаанда дооскан.
Школа чанында Россияның Спорт яамызының база бир хүреш залы ажыттынганы ол. Аңаа Тываның билдингир мөгелериниң киржилгези-биле мастер-класстарны организастап эрттирерин Владислав Ховалыг демдеглээн. Эң-не кол чүүл – ук школаның барык 600 хире өөреникчизи спорт-биле доктаамал өңнүктежип, секцияларже барып, күш-культура кичээлдериниң үезинде улуг, делгем чаа залга кичээлдээр аас-кежиктиг болганнар.
Свердловскунуң 6 дугаар школазы 203 дугаар Запорожье-Хинган Кызыл тук орденниг Суворов дивизиязының маадырларының адын эдилеп турарын онзалап демдеглевес аргазы чок. Шак ындыг маадырлыг атты эдилээн школага Тываның төөгүзүнүң дугайында ном турар ужурлуг деп демдеглээш, Ада-чурттуң Улуг дайынының үезинге тураскааткан «Тыва — фронтуга» деп тураскаалдыг альбомну Тываның Баштыңы Владислав Ховалыг белекке берген.
Чуруктарны интернеттен алган.
