Бөгүн, июнь 5-тиң хүнүнде, Тыва культура төвүнге уругларның этнокультурлуг угланыышкынныг “Чайлаг” дыштанылга лагери ажыттынган.
Уругларны боттарывыстың ёзу-чаңчылдарывыс-биле кижизидип өстүрери кончуг эки дээрзин Тыва үндезин культура төвүнүң коллективи санап турар. Ынчангаш олар тыва улустуң сагыш-сеткил талазы-биле болгаш культурлуг ёзу-чаңчылдарынга үндезилеп, лагерьге эрттирер хемчеглериниң планын ажылдап кылган.
Бир дугаар хүнде Тыва үндезин культура төвүн таныштырары-биле экскурсияны эрттирген. Ооң соонда тыва улустуң национал оюну “Матпаадырның” дузазы-биле келген уругларны бот-боттарын таныштырган. Ол ышкаш тыва өгнүң тургузуун, эт-херекселин база таныштырып, өгге канчаар алдынарының дугайында кичээлди эрттирген.
Баштайгы хүннүң төнчүзүнде уруглар “Бистиң Тыва”, “Декей оо” деп ырыларны деңге ырлажып, допшулуур деп хөгжүм херекселинге ойнаар эге билиглерни шиңгээдип алганнар.
#тыватөп #уруглар #дыштанылга_лагери #тыва_культура #Шын_солун#
