Тыва журналистиканың хоочуну, Тыва Республиканың алдарлыг ажылдакчызы, Россияның Журналистер эвилелиниң кежигүнү Светлана Сюр-ооловна Монгуш чырык өртемчейден кезээ мөңгеде чарлып чоруткан.
Светлана Сюр-ооловна (Ондар) Монгуш 1952 чылдың август 11-де Сүт-Хөл районнуң Кара-Чыраа суурга төрүттүнген. Улуг-Хем районнуң Шагаан-Арыгның № 2 ортумак школазын дооскаш, Кызылдың күрүнениң педагогика институдунуң филология факультединче өөренип кирген. Институтту 1975 чылда дооскаш, Ак-Туругнуң санаторий-кадыкшыдылга школазынга башкылап ажылдап, ажыл-ишчи амыдыралының делгем оруун эгелээн.
Амыдырал-чуртталгазының, ажыл-ижиниң хөй кезиин Светлана Сюр-ооловна тыва журналистикага бараалгаткан. “Тываның аныяктары” солуннуң корректорундан “Тываның аныяктары” (1985–1990), “Шын” (1998–2002, 2008–2012) солуннарның кол редактору албан-дужаалдарга чедир журналистиң чогаадыкчы оруун эрткен. Светлана Сюр-ооловна тыва журналистиканың төөгүзүнде кол редакторнуң албан-дужаалынга ажылдаан баштайгы херээжен журналист.
Светлана Сюр-ооловна Монгуш “Тываның аныяктары” болгаш “Шын” солуннуң кол редакторунга ажылдап турган үелеринде бо солуннарга чоннуң үзел-бодалының туружу күштүг, ажык-чарлыг чорук алгыг турган. Ынчангаш оларның бижикчилери болгаш номчукчулары хөй, тиражы дыка көвүдээн.
Тыва журналистиканың хөгжүлдезинге улуг үлүүн киирген хоочун журналист Светлана Сюр-ооловна Монгуштуң ажыл-херээ, ат-сывы, ат-алдары тыва чоннуң болгаш республиканың төөгүзүнге кажан кезээде артып каар.
Светлана Сюр-ооловнаның овур-хевири журналист эш-өөрүнүң сагыш-сеткилинге кезээде чырып чоруур.
“Шын” солуннуң коллективи Светлана Сюр-ооловнаның өг-бүлезинге, төрелдеринге болгаш чоок кижилеринге ханы кажыыдалды илередип, оларның ажыг-шүжүүн үлежип тур.
Тыва журналистика улуг чидиригге таварышкан
28 февраля 2023
39