Бөгүн, февраль 10-да, ТР-ниң В. Ш. Көк-оол аттыг национал театрынга Тывада Башкының болгаш дагдыныкчының чылы байырлыг ёзулал-биле ажыттынган. Аңаа Тываның Чазак Даргазы Владислав Ховалыг, Дээди Хуралдың удуртукчузу Каң-оол Даваа, сенатор Дина Оюн, өөредилге сайыды Ирина Биче-оол база Татарстанның өөредилге яамызының төлээзи Роза Шаяхметова республиканың башкыларынга, өөредилге адырының ажылдакчыларынга, хоочуннарынга байыр чедирген.
Тываның башкыларының Улуг чыыжынга уткуштур февраль 7-ден 10-га чедир республиканың школаларынга 100 ажыг ажык кичээлдерни эрттирген. Аңаа бүгү Тываның школаларындан 500 ажыг башкылар олурушкан. Ук хемчегниң кол сорулгазы - найысылал биле суурларның школаларының өөредилге методиказының ылгалын шинчилээри. Тергиин түңнелдиг ажык кичээлдерниң материалдарын Тываның телешколазы порталынче киирер. Ол ышкаш тыва дылдың сайзырадырының стратегиязын, тыва ёзу-чаңчылдарның ужур-утказы, Тываның эрте бурунгу төөгүзүнге чаа өөредилге номун үндүрериниң айтырыгларын эртемденнер, башкылар болгаш Чазак төлээлери сайгаржып чугаалашкан.
Регионнуң башкы болгаш дагдыныкчы чылының ажыдыышкынынга тураскааткан хемчеглерже Татарстандан 7 башкы республиканың өөредилге яамызының чалалгазы-биле арга-дуржулга солчур сорулгалыг аалдап келген. Делегацияны Татарстанның өөредилге болгаш эртем аямызының немелде өөредилгезин сайзырадыр килдистиң удуртукчузу Роза Шаяхметова баштаан. Ооң демдеглеп турары-биле алырга, ийи республикалар өөредилге шугумунда үре-түңнелдиг база эп-демниг кады ажылдажылшаны чорудуп турар. Аалчылар Тывага ажык кичээлдер үезинде өөредилгениң тергиин кичээлдерин онзалап, республиканың чурттакчыларының төрээн тыва дылынга, байлак ёзу-чаңчылдарынга чоргааланып чоруурун база эвилең-ээлдек болгаш хүндүлээчелин магадап ханмаанын чугаалап турарлар.
Республикага чылдың дургузунда башкы болгаш дагдыныкчы чылынга тураскаадып, өөредилгениң шынарын экижидери-биле янзы-бүрү эртем-практиктиг болгаш өөредилге шугумунуң хемчеглери болуп эртер.
/ Алиса ДОНГАК
Чингис СААЯНЫҢ тырттырган чуруктары