Тывада хүлээп алыышкын неделязы эгелээн

Март айның 27–31 хүннеринде «Чаңгыс демниг Россия» партияның Тыва Республикада хөй-ниити хүлээп алыр черинде чуртталга-коммунал ажыл-агыйының айтырыгларының талазы-биле хамаатыларны хүлээп алырының неделязы чоруп турар.

Тыва Республиканың Дээди Хуралында (парламентизинде) «Чаңгыс демниг Россия» партияның фракциязының депутаттары, ТР-ниң Чуртталга-коммунал ажыл-агыйының болгаш Тудуг яамыларының, Кызылдың мэриязының, күрүнениң чуртталга оран-савазы инспекциязының, Тыва Республикада хөй аал чурттаар бажыңнарның үндезин септелгезиниң фондузу, а ол ышкаш партийжи төлевилелдерниң аайлап-таарыкчылары хамаатылар-биле хүннүң-не ужуражып турарлар.

Март 27-де Тыва Республиканың Дээди Хуралында (парламентизинде) тудуг, транспорт болгаш чуртталга-коммунал ажыл-агыйы комитединиң даргазы Юрий Ооржак хүлээп алыышкын неделязын ажыткан.
Ужуражылгаларга Кызыл хоорайның чагырга черинде экономика болгаш өнчү-хөреңги харылзааларының талазы-биле департаментиниң муниципалдыг эт-хөреңгини эргелеп-башкарар болгаш даңзылаар килдистиң начальнигиниң оралакчызы, ТР-ниң тудуг адырынга хайгаарал чорудар болгаш күрүнениң чуртталга оран-сава инспекциязының төлээзи Айдың Монгуш, ТР-ниң Тудуг яамызында күрүне программалары болгаш иинвестициялары килдистиң кол специализи Шеңне Иргит киришкен. Ол хүн сайгарып көрген чүүлдер «Аныяк өг-бүлелерни чурттаар оран-сава-биле хындырары» программаның, а ол ышкаш Кыдыкы Соңгу чүк районнарынче үнүп чорутканнарны чурттаар оран-сава алырының ээлчээнге катап тургузарының айтырыглары-биле холбашкан. Кирген санал-оналдарны моон соңгааргы сайгарылгага алган.

Март 28 -те хүлээп алыышкынны Тыва Республиканың Дээди Хуралының (парламентизиниң) оралакчы даргазы Виктор Глухов ТР-ниң чуртталга-коммунал ажыл-агыйының сайыды Мерген Мынын-оол-биле кады эрттирген.

Бөгүн хүлээп алыышкынны депутат Ольга Хомушку, Тыва Республикада хөй аал чурттаар бажыңнарның үндезин септелгезиниң фондузунда килдис начальниги Алдынай Кенден болгаш фондунуң юридиктиг килдизиниң начальниги Шончалай Биче-оол эрттирерлер.
Март 30-де хамаатылар-биле Кызыл хоорайның Төлээлекчилер хуралының депутады, Тывада “Билиг-билдилиг хереглекчиниң школазы” деп партийжи төлевилелдиң координатору Роман Поманисочкин болгаш Кызыл хоорайның чагырга даргазының амыдырал хандырылгазының талазы-биле бирги оралакчызы Александр Черноусов ужуражыр.

Хүлээп алыышкынче (39422) 3-38-31 телефон таварыштыр азы op@tyva.er.ru электроннуг шуудаң дамчыштыр бижидип ап болур.

/Бистиң корр.

#Шын #Тыва #Чуртталгакоммуналажылагый #Медээлер #Тывачазак