Тываның Өөредилге яамызы апрель 30-де «Көдээ суурнуң башкызы» программазынга киржир школа башкыларының шилилдезиниң мөөрейинче билдириишкин хүлээп алыышкынын апрель 30-де доозар, ооң мурнунда апрель 15-те доостур турган. Мөөрейниң негелделери езугаар тиилекчилер 1 млн рубль хемчээлдиг акша компенсациязын алыр.
2026 чылда «Көдээ суурнуң башкызы» программаже 25 млн рубльди республика бюджединде тускайлаан. Ынчап кээрге бо чылын мөөрейге 25 башкыны шилип алыр. Яамының дыңнатканы болза, школаларга 8 математика башкызы, 6 англи дыл башкызы, 3 орус дыл болгаш литература башкызы, 2 биология, 2 физика башкызы, төөгү, химия, информатика, эге класстарга бир-бир башкылар херек.
Мөөрей барык шупту Тываны хаара тудар. Ол дээрге Тээли, Хөнделең, Хайыракан, Үжеп-Аксы, Хөндергей, Шамбалыг, Элегес-Аксы, Солчур, Аржаан, Хүт, Кызыл-Тайга, Балгазын, Самагалдай, Чыргалаңды, Адыр-Кежиг, Арыг-Үзүү, Иштии-Хем, Торгалыг, Хайыракан (Улуг-Хем), Чаа-Хөл, Бай-Даг, ол ышкаш Шагаан-Арыг база Ак-Довурак школалары-дыр. Тываның Баштыңы Владислав Ховалыг көдээ черлерже шыырак специалистерни хаара тударынга программаның чугулазын ооң мурнунда демдеглээн.
Мөөрейниң организакчылары кордакчылар хөйүн дыңнаткан. Апрель 22-ге чедир мөөрейге киржир дээш, 181 кижи билдириишкин киирген. Оларның чүгле үштүң бир кезии шилилге комиссиязынче херек бөлүк документилерин дужааган болганда, шилилгени апрель 30-ге чедир узадыр шиитпир хүлээп алдынган.
«Көдээ черниң башкызы» мөөрейниң дүрүмү-биле алырга, 50 муңдан эвээш чурттакчылыг суурларже көжүп, ажылдаар күзелдиглерни шилип алыр. Программаның киржикчи бүрүзүнге беш чылдан эвээш эвес үе дургузунда шилип алган школазынга албан ажылдаар болгаш 1 млн рубльди алыр.