Тываның бүгү кожууннарындан өөредилге системазының тергиин төлээлерин чыгган башкыларның профессионал мергежил мөөрейиниң регионалдыг чадазы республикада доозулган. Бо чылын мөөрей шимчээшкини мөөрейниң бедик деңнелин база катап бадыткаан: школалар аразынга эрткен чадага 3628 кижи киришкен. Муниципалдыг шилилгениң түңнелинде 202 тергииннер финалче кирген. Республиканың Баштыңы Владислав Ховалыг мөөрейниң тиилекчилеринге, лауреаттарынга, шупту киржикчилерге байырын чедирген.
«Бо чылын Тывада шупту башкыларның чартыы мөөрейге киришкенинге өөрүп тур мен. Ындыг идепкей бистиң башкылар ниитилежилгевистиң доктаамал өзүлдеже чүткүлүнүң эки көргүзүү-дүр» - деп, регионнуң Баштыңы башкыларның улуг сонуургалын база хөгжүлде болгаш сайзыраңгайжыдылгаже доктаамал чүткүлүн демдеглээн.
Бо чылын Тывага «Чылдың башкызы», «Чылдың кижизидикчи башкызы», «Эң эки дагдыныкчы», «Чылдың мастери», «Психолог башкы», «Төрээн дыл болгаш төрээн чогаалдың тергиин башкызы» дээш оон-даа өске профессионал шылгалдаларның 11 мөөрейи эрткен. Мөөрейлер башкылаашкынның тергиин арга-дуржулгаларын тодарадып нептередиринче, өөредилге ажылдакчыларының профессионал мергежилин бедидеринге, өөредилгеге амгы үениң технологияларын деткииринче угланган.
Жюриниң үнелээни ёзугаар Мөңгүн-Тайга кожууннуң Мугур-Аксы суурнуң 1 дугаар школазының биология башкызы Чечек Конзай мөөрейниң тиилекчизи деп атка төлептиг болган. Ооң башкы стажы 13 чыл.
«Бо төлептиг тиилелге-биле сеткилимниң ханызындан байыр чедирип тур мен! Ам бистиң республиканы федералдыг деңнелге төлээлээриниң чугула чадазы мурнунда» - деп, регионнуң Баштыңының байыр чедириишкининде демдеглээн.
Республикада амгы үениң өөредилге хүрээлелин тургузары-биле системалыг ажыл уламчылап турарын регионнуң удуртукчузу демдеглээн. Чурттуң Президентизиниң даалгазы-биле сөөлгү үш чылда Тывада 11 амгы үениң школалары ажыттынып, 8 муң ажыг өөренир чаа олуттар тургустунган. Сөөлгү беш чылда 55 школага улуг септелге ажылдары кылдынган.
«Бо чүгле эгези-дир. Өөредилге чорудуу амгы үениң инфраструктуразын база чаа арга-хевирлерни негеп турар» - деп, ол онзалап демдеглээш, өөредилге системазының хөгжүлдези чүгле инфраструктура чаартылгазы-биле кызыгаарлаттынмазын демдеглээн.
ТР-ниң Чазааның парлалга албаны.
rtyva.ru/press/tuva...