Сибирь язвазының өөскүдүкчүзү барынга лабораторлуг шинчилелдиң харыызы анаа болганы-биле, Кызыл кожууннуң Кур-Чер суурда Үш-Хады деп черде киирген кызыгаарлыг хемчеглерни Тываның Баштыңының айтыышкыны-биле күш чок болдурган. Ол черде малчын коданда мал айыылдыг мал аарыындан өлгенинге каразааш, майның 18-те карантинни чарлаанын сагындыраал.
Тываның ветеринария лабораториязы май 17-де малдың сегинден патологтуг материалды шинчилээн соонда, сибирь язвазының халдавырынга багай харыыны берген. Ол дораан айыылдыг халдавырга удур хемчеглерни база эпидемиологтуг шинчилелди эгелээн.
Ветеринария албанының специалистери, эпидемиологтар бригадазы, долгандыр хүрээлелден хынаар чүүл алыр специалистер бөлүү, Росхереглел хайгааралының ТР-де эргелелинден база ТР-ниң Гигиена болгаш эпидемиология төвүнден дезинфекция бригадазы, Кызыл кожуун эмнелгезинден эмчилер бригадазы, республиканың Кадык камгалал яамызындан специалистер аарыгның тывылган черинче дарый үнген.
Инфекционист, терапевт база педиатр эмчилер кижилерни, мал аарыгларының специалистери малды шинчип көрген соонда, аарыгның им-демдектерин тыппаан. Ындыг болзажок кижилерни эмчи хайгааралында алган. Айыылдыг аарыгны өөскүдүп болур хире девискээрни дезинфекциялаан.
Өлген малдың сегинден материалды алгаш, Тываның чума станциязынга катап хыналда шинчилелче чоруткан. База катап шинчилээн соонда, сибирь язвазының өөскүдүкчүзү чогун бадыткаан протокол майның 22-де тургустунган.
ТР-ниң Чазааның медээзи-биле