Тывада бо чылдың кол спортчу болуушкуну – муниципалитеттер аразында республиканың I чайгы спартакиаданың түңнелдерин үндүрген. Республиканың кожууннарындан 18 эң шыырак чыынды командаларның составында дөрт муң ажыг спортчулар Кызылга ужуражып, тулганнарның тулганнары ат дээш демисешкен.
Маргылдааның түңнелинде, тулган тиилекчи атка төлептиг болуп, кол шаңнал – бодунуң кожуунунга ангарлыг спорт зал тудар сертификатты Чөөн-Хемчик кожууннуң чыында командазы чаалап алган. Мөңгүн медальды Улуг-Хем кожууннуң чыында командазы алган: кылымал шывыглыг футбол шөлү тудар сертификатты спортчуларга тывыскан. Кызыл кожууннуң чыынды командазы үшкү черни ээлеп, спортчу мергежилдер шөлү тудар сертификатты алган.
Маргылдааның дөрттүң бир киржикчизи-ле – 1224 кижи спортчу чедиишкини дээш медальга база хүндүлел бижикке төлептиг болган.
Тываның Баштыңы Владислав Ховалыг ТР-ниң Дээди Хуралының (парламент) депутаттарынга Айыткалын берип тура, муниципалиттер аразынга I дугаар чайгы спартакиаданы эрттирер саналды кииргенин сагындыраал. Аңгы-аңгы назы-харлыг республиканың чурттакчыларын каттыштырган улуг маргылдааларны организастаарын саналдап тура, чажындан тура күш-культурага хандыкшыл бедик спортчу чедиишкиннерге эккээр деп, губернатор демдеглээн.
Спартакиаданың суур, кожуун, республика чадаларынга чээрби ажыг муң чурттакчылар киржип, Чоннуң чаңгыс эп-сеткилиниң чылында чарлаан хемчеглерниң өзээн тургузуп, сөөлгү 30 чылда республиканың амыдыралында эң-не улуг спортчу болуушкун болган. Тос аңгы спортчу хевирге: волейбол, баскетбол, мини-футбол, стол теннизи, шой көдүрер спорт, чиик атлетика, шахмат, шашки база ГТО нормазы дужаарынга маргылдаалар эрткен . Маргылдааның шаңнал фондузу – 3,8 млн. рубль акша болган.
Тываның Спорт яамызы үш чыл болгаш, дараазында чайгы спартакиаданы эрттирерин планнаан, а 2024 чылдың кыжынында спортка ынактар I кышкы Спартакиадага күжүн шенежирлер.
Тываның Чазааның парлалга албаны.
