Тываның Баштыңы Владислав Ховалыг кыска шөлээзинде төрээн черинде чанып келген шериг оолдар-биле ужуражып чугаалашкан. Регионнуң удуртукчузу база тускай шериг операциязының киржикчилери албан эрттирип тургаш, таваржы бээр бергедээшкиннерин, мурнуку шугумда байдалды сайгарганнар. Ада-чуртун камгалаар шериг хүлээлгезин күүседип турар чаңгыс чер чурттугларынга республиканың чонунуң материалдыг болгаш моральдыг дузазы дайынчыларның хей-адын көдүрген. Төрээн чери, өг-бүлези, бодунуң чонунуң демнии болгаш сырый каттышканы дайынчыларывыска улуг күштү, бодунга, тиилелгеге бүзүрелди берип турары демдеглеттинген.
Шериг албанныглар штаттыг чурум-биле албанны эрттирип турарын илеткээн. Тывага чыггаш, оларга эккеп берип турар гуманитарлыг дузалаламчыны үе шаанда ап турарлар.
Республиканың чону, федералдыг, регионалдыг организациялар, хөй-ниити каттыжыышкыннары болгаш бизнес ниитилежилгелер гуманитарлыг чүъктү, техниктиг дериг-херекселдерни чорудуп турар. Чижээ, республика Тиилелге хүнүнүң бүдүүзүнде эрткен Россияның демир-оруктары биле Улусчу фронтунуң акциязынга киржип, бистиң дайынчыларывысче доктар билбес дөртен ажыг машинаны чоруткан. Республиканың кожууннары, сайгарлыкчылар, организациялар, эрге-чагырга органнары ол автомобильдерни дамчыткан. Тыва Республика тускай шериг операциязының зоназынче ол хире санныг автотехниканы чоруткан чүгле чаңгыс регион болган.
— Бүгү республикадан чыггаш, доктаамал чорудуп турар шупту гуманитарлыг дузаламчывысты бистиң оолдарывыс үе шаанда аразында үлежип ап турарын дыңнаарга, өөрүнчүг-дүр. Республиканың сагыш човангыр чурттакчыларынга, хөй-ниитичилерге, бизнестиң төлээлеринге, эрге-чагырганың федералдыг болгаш регионалдыг девискээр органнарынга ол дээш өөрүп четтиргенивисти илередип чоруур мен. Олар база бистиң шериглеривис ышкаш, минута бүрүзүнде ында байдалды бодап чоруурлар – деп, Владислав Ховалыг бодунуң блогунда ужуражылганың түңнелин бижээн.
55-ки мото-адыгжы (дагжы) кезектиң госпиталының баазазынга үнүүшкүннүг шериг-эмчи комиссиязын эрттиреринге деткимчени көргүзер дилегни РФ-тиң Камгалал яамызынче кииргенин губернатор дыңнаткан. Херектиң ужуру болза, дайынчы даалга күүседип тургаш, балыгланган дайынчылар амгы үеде эмчи комиссиязын республикадан дашкаар эртип турар. Республика удуртукчузунуң адрезинде келген дилеглерде дайынчыларның-даа, оларның өг-бүлелериниң-даа ол айтырыы хөйү-биле көдүрүлген.
Владислав Ховалыг ол айтырыг талазы-биле эки шимчээшкин барын дыңнаткан. Республика Баштыңы чурттуң шериг ведомствозунче чоруткан дилээниң түңнелдери-биле кандыг шиитпир хүлээп алдынганын немей дыңнадырын аазаан.