Владислав Ховалыг «Спутник» микрорайонунда хөй каът бажыңнарлыг чаа чуртталга комплекизиниң тудуун бо хонуктарда хынап чораан. 2030 чылга чедир аңаа ниитизи-биле 100 муң дөрбелчин метр ажыг ниити шөлдүг, 2007 квартиралыг 25 бажыңны тудары планнаттынган.
Республика Баштыңының хыналдазының үезинде тудугжулар 115 аал чурттаар үш бажыңны ажыглалче кииргенин, 2026 чылда ам-даа 694 квартиралыг 10 тудугну дужаарын чугаалаан. Чиигелделиг ипотека программазы-биле 230 квартираны саткан. Бажыңнарның чамдыызын аварийлиг чуртталга бажыңнарын көжүрер программаның киржикчилеринге база өскүс уругларга үлээр. Бюджет акша-хөреңгизи-биле өскүс уругларга он квартираны садып алган.
«Бажың чанының девискээрлери чаагайжыттынган: уруглар ойнаар болгаш спортчу шөлдерлиг, автомашиналар тургузар черлиг, чурттакчыларга таарымчалыг байдалдарлыг. Чаа микрорайонга тудуглар ам-даа немежир, ынчангаш инфраструктура тудуун дүргедедир дээш ажылдаар: школаже болгаш микрорайонче орукту асфальтылап, чоокку үеде светофорну тургузуп, чадаг кижилер эртер черлерни база кылыр» — деп, Владислав Ховалыг тайылбырлаан.
ТР-ниң Тудуг яамызының дыңнатканы-биле алырга, 2025 чылда федералдыг бюджеттен немелде акшаландырыышкын-биле чаа тудуглардан квартираларны 75 өскүс уруглар алыр. Амгы үеде белен квартираларны күрүне өнчүзүнче шилчидер ажыл чоруп турар, ооң соонда социал хөлезилел дугуржулгазы-биле өскүс уругларга дамчыдар.
Аварийлиг ийи бажыңда чурттап турар 15 өг-бүле бо чаа тудуглардан халас чурттаар черлерни алыр. Судтуң шиитпири-биле чурттаарынга таарышпас болгаш өскээр көжүрер деп санаан Кызылдың Эрзинская кудумчузунда өрттен когараан 31 дугаарлыг база Каа-Хем суурнуң Пионерская кудумчузунда 26 дугаарлыг бажыңдан шупту 15 өг-бүле чурттаар оран-саваны алыр.
ТР-ниң Чазааның парлалга албаны.
