Экер-оол Манчын ТР-ниң Дээди Хуралында (парламентиде) Тываның Баштыңының төлээзи кылдыр томуйлаткан. Ооң мурнунда ол албан-дужаалды амгы үеде чазак даргазының корум-чурум камгалаар органнар-биле удур-дедир ажылдажылга айтырыгларын харыылап турар Виталий Бартына-Сады ээлеп турган.
Экер-оол Маринович Манчын Тере-Хөл кожууннуң Кунгуртуг суурга төрүттүнген. Кызылдың педагогика институдунга “физика болгаш математика башкызы" мергежилди чедип алган. Аңгы-аңгы чылдарда Хову-Аксының 1, 2 дугаар школаларынга, Кызыл хоорайның 5 дугаар гимназиязынга математика, Кунгуртуг суурнуң школазынга, Иркутск облазының Алыгджер ортумак школа-интернадынга ниитилел билиглерин башкылаан.
1994 чылдан 1998 чылга чедир Сайлыг ортумак школазының директору, оон Чеди-Хөл кожууннуң өөредилге килдизиниң эргелекчизи бооп ажылдаан.
1998 чылдан 2022 чылга чедир - ТР-ниң Дээди Хуралының (парламент) депутады, күрүне тудуу болгаш тус чер бот-башкарылгазының комитет даргазы.
Тере-Хөл кожуун чагыргазын 2008 чылдан 2011 чылга чедир даргалаан.
2011 чылдан 2014 чылга чедир «Тере-Хөл» ПРОП» МУБ, «Тере-Хөл» КХН-ге ажылдап чораан.
Тере-Хөл кожууннуң Эми суму көдээ чагырга чериниң даргазының албан-хүлээлгезин 2014 чылдың октябрьдан 2016 чылдың январьга чедир күүсеткен. 2018-2021 чылдарда Ыраккы Соңгу чүктүң биче буурай үндезин чоннарының айтырыгларын, Тере-Хөл кожуун чагыргазының амыдырал-хандырылга, корум-чурум профилактика айтырыгларын харыылап турган.
Тере-Хөл кожууннуң Төлээлекчилер хуралының депутадынга соңгуткан. Тере-Хөл кожууннуң чурттакчы чонунуң, тожу-тываларының эрге-ажыын камгалаар хөй-ниити ажылын чорудуп турган.
Экер-оол Манчын чаа албан-дужаалы-биле республиканың кол хоойлужудулга органынга ТР-ниң Чазааның сонуургалдарын, ынаар киирген ТР-ниң Чазааның ажылдап кылганы нормативтиг-эрге-хоойлу актыларының төлевилелдерин таныштырып, тыва парламентиниң сессияларынга болгаш комитет хуралдарынга киржир хүлээлгелиг.
Тываның Баштыңы ТР-ниң Дээди Хуралында бодунуң төлээзин томуйлаан
8 марта 2023
30