Чазак Даргазының информастыг блогун удуртуп турар оралакчызы Айдын Чюдюк тыва журналистиканың хоочуннары-биле ужуражып тура, массалыг информация чепсектериниң база массалыг коммуникация адырында Тыва Республиканың Баштыңының грант алыкчыларының аттарын чарлаан. Массалыг информация чепсектериниң беш редакциязы социал угланыышкынныг медиа төлевилелдерин хөгжүдеринге 200-ден 350 муң рубльдиң грант деткимчезин алган.
Чазак Даргазының оралакчызы-биле ужуражылгага ТР-ниң алдарлыг журнализи Роман Всеволодович Тас-оол, ТР-ниң алдарлыг журнализи, чогаалчы Кара-Күске Күнзекович Чооду, ТР-ниң алдарлыг ажылдакчызы, “Шын” солуннуң штаттан дашкаар корреспондентизи Нина Даш-ооловна Серенот, РФ-тиң алдарлыг журнализи Александр Сан-оолович Шоюн, ТР-ниң алдарлыг ажылдакчызы, «Шын» база «Тываның аныяктары» солуннарның бирги херээжен редактору Светлана Сюр-ооловна Монгуш, Тываның журналистер эвилелиниң даргазы Эльвира Сергеевна Лифанова, «Твой Информ» солуннуң, «Тувиночка» сеткүүлдүң, «108 канал» телеканалдың төлээлери база чалаткан аалчылар киришкен.
Чалаткан аалчылар база чазак даргазының оралакчызы аяк шайны аартап олура, адырның амгы байдалын, Журналистер эвилелиниң амгы ажыл-чорудулгазын, журналистер ниитилежилгезиниң чидиг айтырыгларын сайгарып, МИЧ чамдык төлээлериниң чайы чок-даа болза, хөй-ниити ажыл-чорудулгазының планнары-биле үлешкен.
Айдын Чюдюк хоочуннарга четтиргенин илереткеш, аныяк коллегаларның мергежилинге бердингенин чугаалааш, журналистерниң чугула ажылын демдеглээн. Белен эвес бо үеде оларның ажылы дыка херек дээрзин, чазак даргазының оралакчызы чугаалааш, адырның хоочуннарынга белектерни сунуп, массалыг информация чепсектериниң адырында Тыва Республиканың Баштыңының шаңналы дээш мөөрейниң тиилекчилеринге сертификаттарны тывыскан.
"Алдын кушкаш" уруглар сеткүүлүнүң тургузукчузу Шоюн Александр Сан-оолович «Тыва дылым – ыдык өнчүм» төлевилелди боттандырары-биле уруглар сеткүүлүн тыва дылга парлаарынга Тыва Республиканың Баштыңының МИЧ адырында 200000 рубльдиң шаңнал сертификадынга төлептиг болган.
"Тувиночка" сеткүүлдүң кол редактору Сандан Роланда Сергеевна «Развивающаяся Тува» төлевилел күүселдезинче 200 000 рубльдиң сертификадын алган.
Тываның гуманитарлыг болгаш тускай социал-экономиктиг шинчилелдер институдунуң дыл секторунуң эртем ажылдакчызы Ондар Чойган Геннадиевич Википедияның тыва адырында республика дугайында статьялар чыыр «Марафон Миллениум» төлевилелди боттандырарынга губернатордан деткимче кылдыр 200000 рубльдиң сертификадын алган.
"108 канал" редакциязы кадыкшылы кызыгаарлыг кижилерниң айтырыгларын чырыткан “Кызыгаар чок чуртталга” төлевилелди боттандырарынга 250000 рубльдиң сертификадын алган. Телеканалдың корреспондентизи Херел Ооржакка сертификатты тывыскан.
"Твой информ" солуннуң редактору Черноусова Наталья Александровна республикада национал төлевилелдер күүселдезиниң дугайында таныштырар «Национал төлевилелдер – кижилер дугайында» деп төлевилелинге 350000 рубль хемчээлдиг күрүне деткимчезин алган.
#Тывачазак
