Тываның чурттакчылары 8 хүн дыштаныр

Май айда Тываның чурттакчы чону, Россияның бүгү хамаатылары ышкаш, ийи-ле неделя ажылдаар. А Тывага база бир дыштаныр хүн немешкен. Ниитизи-биле, беш ажылчын неделяда, регионнуң чурттакчылары 8 хүн дыштаныр.

Дыштаныр хүннерниң бирги кезээ апрель 29-тан май 1-ге чедер. Ол хүннерде бүгү чурт Частың болгаш Күш-ажылдың байырлалында дыштаныр. Вторник хүнү май 2-ден, май 5 пятницага чедир — ажыл хүннери.

Май 6-дан дыштаныр хүннерниң ийиги чартыы эгелээр. Тываның чурттакчыларынга ол дыштаныр хүннер май 10-да доостур. Май 6, 7 – суббота биле улуг-хүн. РФ-тиң Чазааның доктаалы езугаар январь 8-тиң улуг-хүнү май 8-че шилчээн. Май 6 – Тыва Республиканың Конституциязының хүнү. Ол хүннү регионнуң хоойлу-дүрүмү езугаар ажылдавас байырлал хүнү кылдыр доктааткан. Ындыг болза-даа, ол хүн суббота болганда, ону байырлалдар төнчүзүнде, дараазында ажыл хүнүнче шилчиткен. Айыттынган үеде дараазында ажыл хүнү май 10, ол хүн Тывага база-ла дыштаныр хүн болур.

Ынчап кээрге, Тываның чурттакчылары май 6-дан 9-ка чедир Тиилелге хүнүн, а 10-да, дыштаныр хүн капсырлажы бергени-биле, Тыва Республиканың Конституциязының хүнүн байырлаар.

#Тывачазак #Байырлалдар #Дыштанырхүннер #Шынсолун #Тывадыл