Россия Федерациязыныӊ Чиӊгине прокурорунуӊ оралакчызы Дмитрий Демешин ажыл-агый аайы-биле Тыва Республикада чедип келген.
Кызыл хоорайга чоннуӊ хууда хүлээп алыышкынын эрттирген. Чон хүлээр хемчегге республиканыӊ прокурору Сергей Дябкин, Тыва Республиканыӊ Баштыӊы Владислав Ховалыг, ТР-ниӊ Чазааныӊ Даргазыныӊ оралакчызы Орлан Сарыглар, регионалдыг ведомстволарныӊ, республиканыӊ яамыларыныӊ төлээлери киришкен.
Дмитрий Демешинниӊ хууда хүлээп алыышкынынга Кызыл хоорайныӊ, Барыын-Хемчик, Кызыл, Тожу, Чеди-Хөл болгаш республиканыӊ оон-даа өске кожууннарыныӊ чурттакчылары келген.
Хамаатыларныӊ чурттаар оран-сава, чер участогу алыр эрге-ажыктарын, күш-ажылчы эргелерин, ол ышкаш өөредилге болгаш кадык камгалал адырында хоойлужудулгаларны хажыдып турарыныӊ чылдагааннары-биле тус черниӊ чону прокурорга хууда ужуражып, билдириишкиннерни киирер ужурга таварышкан.
Чижээ, хөй ажы-төлдүг өг-бүлелер Кызыл хоорайныӊ девискээринге чер участогу алыр ужурлуг. Ынчалза-даа ону дыка үр үе дургузунда ап чадап турарыныӊ дугайында олар дыӊнаткан.
Ниити өөредилгелиг ортумак школаныӊ бирги клазынче хүлээп албайн турарыныӊ дугайында Кызыл кожууннуӊ чурттакчызы хомудап чугаалаан.
Чайгы кадыкшыдылга лагеринче бичии уруунга путевка тып бээринге дузалажырын тускай шериг операциязыныӊ киржикчизиниӊ өөнүӊ ишти дилеп чугаалаан.
Дмитрий Демешин улустуӊ эрге-ажыктарын катап тургузарынче угланган хыналда хемчеглерни организастаарыныӊ дугайында даалганы республиканыӊ прокурорунга берген. Келген кижи бүрүзүнүӊ билдириишкинин канчаар шиитпирлеп турарын, хыналданыӊ түӊнелдерин ол боду контрольдаар.
/ РФ-тиӊ Чиӊгине Прокуратуразыныӊ СФО-да эргелелиниӊ медээзи-биле Р. ДЕМЧИК очулдурган.
