ТР-НИҢ МЕДИЦИНА ПАЛАТАЗЫНЫҢ 10 ЧЫЛ ОЮНГА|
Тываның бүгү-ле эмчилерин каттыштырган Медицина палатазын тургузар дугайында саналды Анатолий Дамба-Хуурак 2010 чылдан 2012 чылга чедир Чазак Даргазының оралакчызы болбушаан, республиканың кадык камгалал болгаш социал хөгжүлде сайыды болуп ажылдап турган үезинде эгелээн. Ону тургузарынга эвээш эвес үе, күженниишкин болгаш ажыл негеттинген. Түңнелинде, 2013 чылда, Тывага Медицина палатазы тургустунган.
Хөй-ниити организациязының баштайгы удуртукчузунга РФ-тиң алдарлыг эмчизи, ТР-ниң Кадык камгалалының алдарлыг ажылдакчызы, 2 дугаар республика эмнелгезиниң улуг эмчизи Наталья Воверенени 100 хуу бадылаан.
Кажан ол Тывадан көжүп чоруй баарга, 2014 чылдың февраль 21-де, ооң орнунга ТР-ниң улустуң эмчизи, медицина эртемнериниң кандидады, 1 дугаар республика эмнелгезиниң улуг эмчизи Вячеслав Ховалыг томуйлаткан. Үшкү удуртукчузу РФ-тиң Кадык камгалалының тергиини, 1 дугаар республика эмнелгезиниң өртең салбырының эргелекчизи Марианна Мөге-Хүрең болган.
Күүсекчи дирекцияның удуртукчуларынга ТР-ниң улустуң эмчизи, РФ-тиң Кадык камгалалының тергиини, чүрек эмчизи Надежда Ооржак, РФ-тиң Кадык камгалалының тергиини, республиканың 1 дугаар эмнелгезиниң улуг эмчизиниң оралакчызы Раушан Сандан-оол олар ажылдаан.
Тываның Медицина палатазының кол сорулгазы— республиканың эмчилер ниитилелин каттыштырары, чоннуң кадыкшылын камгалаар болгаш ук ажылдың шынарын экижидер системаның боттанылгазын кады ажылдап кылыры.
2014 чылдың март айда ТР-ниң Медицина палатазының сайтызы ажылдап эгелээн. Ук сайтыдан ооң ажылының, республиканың болгаш Россияның кадык камгалал адырының чаа-чаа медээлерин көрүп болур. Ол-ла чылын республиканың аныяк эмчилериниң шуулганы болуп эрткен. Ук хемчег хөй-ниитиниң нарын айтырыгларынче аныяк специалистерниң кичээнгейин хаара туткан. Ол ышкаш аныяк эмчилерниң деңнелин бедидер сорулгалыг «Тергиин аныяк эмчи» деп мөөрейни база эрттирген.
«Тус черниң эмчизи» деп программаның киржикчилериниң назы-харын 45 харга чедир улгаттырарын база күш-ажыл стажынче эмчилерниң интернатура болгаш ординатурага өөренип чораан чылдарын база киирерин удуртулга кежигүннери сүмелээн.
Медицина палатазынга Аныяктар комитедин база ажыткан. Ооң кол сорулгазы республикадан аныяк кадрларның чоруй баарын болдурбазы, аныяк эмчилерге патриотчу кижизидилге талазы-биле лекцияларны, семинарларны организастаары, эмчилерге материалдыг эвес деткимчени тургузары болур. Бо угланыышкын-биле Медицина палатазының Росси Күжүгет баштаан 3-кү удуртулгазы хөй ажылды кылган.
Хөй-ниити албан чериниң улуг ужур-уткалыг төлевилелдериниң бирээзинге «Эмчилер аллеязы» хамааржыр. Ынаар маадыр эмчилерниң тураскаалдарын болгаш ооң девискээрин чаагайжыдары кирип турар. ТР-ниң Медицина палатазының эгелээн болгаш ажылдап кылган бо төлевилели «Хоорай чаагайжыдылгазын тургузары» деп регионалдыг төлевилелдиң даңзызынче кирген. Ооң тудуу болгаш чаагайжыдылгазы 2023 чылдың 3-кү кварталында доостур.
Эмнелге ажылдакчызының ат-алдарын бедидер сорулга-биле чылдың-на «ТР-ниң кадык камгалалының тажы болгаш даңгыназы» мөөрейни эрттирип турар. ТР-ниң Медицина палатазының юризи эмнелге ажылдакчыларының эрге-хоойлу талазы-биле билиин бедидери-биле база лекцияларны номчуп турар.
Ол ышкаш социал четкилерде Медицина палатазының албан ёзугаар арыннары, бөлүктери идепкейлиг ажылдап турар. Ында бүдүн республиканың эмнелге ажылдакчылары бот-боттарының аразында янзы-бүрү темаларга харылзажып, чаа-чаа медээлерни дамчыдып турарлар.
Covid-19 аарыы нептереп турар үеде, суурларда эмнелге ажылдакчыларын “Социал хөмүр” программазынче кииреринге, чамдыктарынга ажылдап тургаш, коронавирустан аарый берген үеде, бээр ужурлуг төлевирлерден ойталаптарга база Медицина палатазы дузалажып турган.
Ук организацияның эгелекчи саналы-биле Кызыл хоорайның мэриязы чылдың-на уруглар сады хереглеп турар эмнелге ажылдакчыларының уругларынга 30 олутту аңгылап берип турар. Уруглар садтарында олуттар чедишпес болганындан, Кызыл хоорайда эмнелге ажылдакчыларының уругларынга, уруглар садынга олут бергижеге чедир хайгаараар төп тургузар төлевилелди ажылдап кылган. 2023 чылдың июнь айда ТР-ниң Медицина палатазының 10 чылдаан оюнга тураскаадып, эмнелге ажылдакчыларының шуулганын эрттирерин планнап турар.
2022 чылдың октябрь айдан амгы үеге чедир Медицина палатазының чаа тургузуу Анджела Канчыыр-оолдуң удуртулгазы-биле бодунуң сорулгаларын чедип ап, чаа-чаа төлевилелдерни кылып, чедиишкинниг ажылдап турар.
Чыжыргана СААЯ.
Чуруктарны Медицина палатазының архивинден алган.
"Шын" №44 2023 чылдың июнь 17
