“Кадыкшыл” национал төлевилелдиң кадык камгалалының эге чадазын чаартыр программа-биле бо чылдың төнчүзүнге чедир республиканың эмнелгелеринге планда кирген 64 сан эмчиниң чаа дериг-херекселдериниң 60-ы салдынган.
Ол ышкаш эргижирээн дериг-херекселдерни чаарттыры болгаш солууру база көрдүнген. Аңаа федералдыг бюджеттен – 227 851,5 муң рубль, республика бюджединден – 5 253,5 муң рубль, ниитизи-биле – 233 105,0 муң рубльга 160 сан дериг-херекселдер хамааржыр.
Чаа дериг-херекселдерни 14 кожууннуң төп эмнелгелери, 3 ММЦ, Республиканың консультация-диагностика төвү, Республиканың дугаары 1, дугаары 2 эмнелгелериниң консультация-диагностика поликлиникалары, Республиканың уруглар эмнелгезинге салыр болган.
Эмчиниң чаа дериг-херекселдери эмчи шинчилгезиниң шынарын экижидеринге болгаш чоннуң кадыкшылын быжыглаарынга хамаарышкан чугула айтырыгларны шиитпирлээринге улуг дузалыг болуп турар дээрзин Тываның кадык камгалалының оралакчы сайыды Орлан Ондар чугаалаан.
“Эрткен чылын ук программа-биле Тыва 81 чаа дериг-херекселди алган. Ол ышкаш чаа туттунган ФАП-тар, амбулаторлуг эмнээшкин черлери чаа оран-савалыг болурундан аңгыда, чаа эт-сеп, оргтехника болгаш дүрген коштунар интернеттиг болуп турары, эмчилерниң шынарлыг болгаш үре-түңнелдиг ажылдаарынга кончуг дузалыг” – деп, ол демдеглээн.
ТР-ниң Кадык камгалал яамызының медээзи-биле К. МОНГУШ белеткээн.
